WILLEMSTAD.- Team Kingdom of the Netherlands, selekshon hulandes di beisbòl ku ta konta ku vários pelotero di Kòrsou i Aruba, di 10 pa 24 di novèmber 2024 lo ta aktivo den Premier 12. E torneo lo konta ku e diesdos mihó ekiponan riba lista mundial di World Baseball and Softball Confederation (WBSC). Hulanda ta pará na di shete puesto riba e ranking, i esei e.o. danki na e prestashon di teamnan hubenil hulandes ku a akumulá sufisiente punto pa drecha e posishon di Hulanda.
Premier 12 ta keda organisá pa di tres biaha. Den 2015 e team di Reino Hulandes a yega te kuart final, kaminda a kai kontra di Merka.
Den 2019, na Mexico, tabata un enorme desepshon na momento ku no a gana ningun partido, sufriendo derota na man di Merka, Mexico i Rep. Dominicana.
Den 2024 Hulanda ta haña un oportunidat pa mustra ku debidamente tin nivel. E sorteo di Premier 12 lo tuma lugá otro aña i despues di esei lo haña un bista na unda Hulanda lo hunga. Pa e edishon aki lo tin dos pul di seis ekipo. Un pul ta hunga na Taiwan i e otro na Mexico, miéntras ku e buèlta final di Premier 12 lo ta na Hapon.
