60% partisipantenan na enkuesta ta aploudí e inisiativa di un área sin mucha den avion
WILLEMSTAD.-E área liber di mucha ku pasaheronan di Corendon airlines por skohe ta kosta entre 45 euro mas karu. Anto si banda di esei e pasahero ta deseá pa haña mas espasio pa strèk su pia tambe esei lo kosta 100 euro mas tantu.
Anteriormente Corendon a anunsiá ku den su avionnan ku ta bula entre Amsterdam i Kòrsou, tin un área spesial sin mucha ku e pasahero por skohe pe. Ta pasaheronan riba 16 aña so por hasi reservashon pa e área spesial aki. ‘The Only Adult-zone’ ta konsistí di 93 asiento te dilanti den e avion. E zona aki ta físikamente dividí for di e sobra di e avion ku muraya i kortina.
Corendon ta enfatisá ku a krea e espasio aki pa kumpli ku deseo di e pasaheronan ku ta deseá èkstra trankilidat i konfort durante di e buelo. Na mes momentu esaki ta trese trankilidat pa pasaheronan ku ta biahando ku mucha pasobra lo no tin asuntu ku e yunan ta kousa molèster pa otro pasaheronan. Otro kompanianan id aviashon oropeo manera TUI, KLM i Transavia no tin plan ainda pa tene mucha for di sierto áreanan di nan avionnan.
A surgi un diskushon si a base di e desaroyo aki. E inisiativa di Corendon ta motibu di diskushon pasobra unda e balansa ta entre e trankilidat di pasaheronan adulto i e derecho di famianan ku mucha na bordo. Ta parse ku pasaheronan ta dividí riba e konsepto aki, kaminda 60% di esnan ku a partisipá na un enkuesta riba e tópiko aki ta konsiderá e desishon pa krea un espasio solamente adulto den avion algu sumamente positivo, miéntras ku 27% ta kontra i 14% ta indesiso.
Novèmber aki lo implementá e inisiativa aki riba sierto buelonan di Corendon ku ta bula entre Amsterdam i Kòrsou.