WILLEMSTAD.- E balor di e moneda general Europeo, Euro, a kai bou di balor di dòler djárason último pa promé biaha den dos dékada. Un dia promé, e nivel di euro a yega esun di dòler pues tabata igual na balor. Algu ku tambe den 20 aña no a sosodé. Esei ta hasi Europa mas barata pa merikano pero Merka ta bira mas karu pa e europeo.
Segun presidente di Kámara di Komersio di Kòrsou Billy Jonckheer e motibu prinsipal ku dòler tin un balor hopi haltu awor, te ku e interes na Merka a subi. Ta trata di interes ku hendenan tin ku paga pa un fiansa na Merka.
Komo konsekuensia un moveshon a tuma lugá. Pa hopi hende dòler a bira mas interesante ku euro. Banda di esei tin e guera na Ukrania. Segun Jonckheer semper ora tin guera na mundu, balor di dòler ta subi. Tambe tin un reseshon na kaminda. ‘‘Tur esaki a buta ku e balor di euro a baha na un nivel nunka bisto.’’ Segun Jonckheer tin eksperto finansiero ku ta ferwagt ku balor di euro lo sigui baha kompará ku e dòler i ku balor di 1 euro ta bira 0,95 dòler.
Jonckheer ta splika ku den tempu di krísis hopi hende ta keda ku konfiansa den e dòler. “Esaki ta konta tambe pa oro. Ora tin gueranan rònt mundu hende no ke tuma hopi riesgo i nan ta invertí den dòler i oro.’’
Segun Jonckheer maneho di Banko Sentral di Merka ta hunga un ròl hopi grandi tambe. Banko Sentral a subi interes na Merka i esaki tin su konsekuensianan dramátiko rònt mundu. Motibu ku Banko Sentral a tuma desishon pa subi interes ta pa wanta inflashon na Merka. Jonckheer: ‘‘Banko Sentral, ku nan maneho, ke ‘slow down’ kresementu di ekonomia na Merka. Pa evitá ku inflashon ta bira hopi grandi.’’
Segun Jonckheer na Kòrsou nos no por hasi nada pa influensiá e situashon. ‘‘Nos ta hopi chikitu, nos ta un punto na mundu.’’ E ta splika ku moneda di Kòrsou ta mará na dòler merikano. ‘‘Subida i bahada di dòler nos ta sintié. No tin nada ku nos por hasi. Den bes en kuando e ta sali nos bon, den bes en kuando e ta sali nos malu. Ayera un hende a puntra mi kiko lo pasa si nos lo ta mará na euro. Mi no ta mira pasa.’’ E ta splika ku Boneiru – ku ta un munisipio speshal di Hulanda – tambe ta mará na dòler. Esaki tin di aber ku mayoria di negoshi ku nos ta hasi ta ku Merka òf den region. Ku ta nifiká ku dòler ta hopi mas importante ku euro.’’
