WILLEMSTAD.-Botikario Shaheen Elhage durante di e akshon di trahadónan di botika a Fòrti a splika ku nan no ta aseptá pa papia ku kolaboradó di minister. E grupo ke papia ku minister pasobra semper nan a atendé ku minister. E trahadónan a bai Fòrti pa haña kontakto ku e minister di Salubridat.
Riba porta di tur botika por a mira un papel ku ta indiká ku tur botika ta será i ku den kaso di emergensia por bai botika di Curaçao Medical Center. Di parti di CMC mesora a reakshoná bisando ku e botika den CMC ta solamente pa pashènt i empleadonan di e instituto. Relashoná ku esaki Elhage a splika ku nan ta referí na kaso di emergensia. Pues semper ku tin un kaso di emergensia i hende bai hospital e instituto ta pèrkurá pa e hende haña su remedinan pa e kaso di emergensia. Ta lógiko ku hende no por bai traha resèpt normal na botika di CMC.
Na 2001 tambe e asosiashon di botikario i doñonan di botika a tene mesun tipo di akshon, pues di 22 aña mesun problemanan ta eksistí, i a keda mesun kaminda. Nan ta tuma nota ku parti di pueblo ku ta dependé di gobièrnu ta haña atenshon i yudansa, pero botikario i empleadonan ku ta duna servisio basa riba maneho ku gobièrnu ta hiba si no ta haña e balor ku nan meresé. Ki perspektiva tin pa e trahadó den botika ku tin 20 aña sin mira adelanto.
Shaheen Elhage ta enfatisá ku nan ke un kontesta riba e proposishon ku nan a hasi pendiente e kálkulonan ku mester hasi. Ademas e landsverordening di basisverzekering ta bisa ku mester bini un kontrakt for di 2013 i awor aki a yega 2023 i te ainda no tin niun kontrakt. Kada bia ta bisa ku mester wak e outoridat di kuido kiko esei ta bisa i hasi. Ta yega un kaminda ku mester tuma desishon i tanten nan por sigui traha. Trahadónan dilanti Fòrti a kuminsá yama e minister pafó, pasobra e mandatario a pone riba Facebook ku 10’or e ta papia ku trahadónan, pero ketu.
