Update: Sospechosonan kaso lote di droga transportá pa departamentu forensiko
WILLEMSTAD.- Awe mainta e dos hòmbernan sospechoso den e kaso transporte di droga a keda hiba na e departamentu forensiko di reshèrshi.
Tabata ayera den oranan di mèrdia ku Wardakosta a tuma nota di e boto nabegando den nos awanan teritorial i durante di un kontrol rutinario a dal den basta droga. Te na e momentonan aki e kantidat total ta deskonosí pa Extra. Di otro fuentenan por a komprendé ku ta trata di un kargamentu basta formal. Tambe por a tuma nota di tur e barínan ku a keda transportá riba e pikòpnan di outoridatnan ku a bai kima e droga mesora ayera den oranan tempran di atardi. Nos a konta sigur un kantidat di kuater pa seis barí grandi ku kontenido/droga.
Manera Extra a indiká den su promé informe, ta trata di un boto di piskadó registrá lokalmente i e tripulashon tabata konsistí di personanan lokal.
Bosero di Warda Kosta sra. Shalick Clement a konfirmá e informashon di e hayasgo di e droga, pero a indiká ku no por bai den detaye mirando ku te ku ayera nochi, ainda tabatin investigashonnan tumando lugá. Loke si e por a konfirmá ta ku a konfiská e boto, e kontrabanda abordo i tambe e personanan ku tabata nabegá riba e boto en kuestion.
Pa loke ta e personanan detené, informashonnan ku EXTRA ta disponé di dje ta papia di un boto di un famia komersiante na Kòrsou. Parse un di e detenidonan ta un hende lokal tambe. Nos tin detaye di su nòmber pero nos no tin konfirmashon di ni Warda Kosta ni polis pa nos por divulgá esaki ainda.
Warda Kosta a primintí di bin awe ku mas detaye.
