ATLANTA.- Djasabra atardi e frankisia di a inmortalisá e number 25 di e pelotero yu di Kòrsou Andruw Jones dor di retirá su number, kual ta nifiká ku nunka mas esaki lo keda bistí pa un otro hungadó den e organisashon. Despues di un seremonia emoshonal i bunita, a revelá e number 25 di Andruw Jones huntu ku otro grandinan ku nan number a keda retirá manera Dale Murphy, Bobby Cox, Warren Spahn, Chipper Jones, John Smoltz, Greg Maddux, Tom Glavine, Hank Aaron i otro nan. E number 25, a bira e di 11 number den historia di e frankisia ku ta keda retirá. Den atardi, tabatin un selebrashon chikí organisá pa e propio Jones, kaminda tur su invitadonan tabata tei manera minister di desaroyo ekonómiko Ruisandro Cijntje, direktor general di CTB Hugo Clarinda, su amigunan djaserka i di mes su famianan entre otro su mama, ruman muhé i su yu muhé huntu ku su kasá. Despues di esei e atenshon a bai pa riba tereno ora ku algun ehekutivo di Braves a duna palabra huntu ku e picher legendario Glavine, pa despues Andruw mes hiba palabra. El a tira e promé lansamentu di e partido ku e otro yu di Kòrsou Ozzie Albies fungiendo komo kècher. Den stadion tambe nan a parti 15 mil “bobblehead” di Andruw Jones i tambe tabatin plachinan ku su number 25 ariba ku fanátikonan tabata zuai. Un pabien na Andruw Jones ku e logro grandi aki. Riba algun foto, por mira algun momentu di e evento históriko aki.
){kind=link}