Chanella La Cruz
Cafe Magic

Cafe Magic ta situá na skina Lyraweg/Perseusweg. Un lugá ku ta bal un bishita. I p’esei nos ta dediká e Djasabra aki na e bon trabou ku Cafe Magic ta hasi pa nos hóbennan ku limitashon leve. Chanella La Cruz ta guia e hóbennan huntu ku su personal, siña nan tur loke ta kushiná i tambe atendé ku kliente ku ta bishitá e cafe pa desayuno òf almuerso. Chanella ta yama e cafe aki unu mágiko pasobra tin algu sumamente spesial einan. Ei ta un cafe kaminda hende ku limitashon leve ta traha, nan ta sirbi, kushiná, traha pastechi ku un amor úniko.

 Idea di tres dama 

Chanella a konta nos ku mas òf ménos 4 pa 5 aña pasá tabatin tres dama ku no konosé otro i nan tur tabata kana ku e mesun pensamentu. Ta trata di Miranda, Vicky ku Karen i un kaminda nan a topa i a bin ku nan mes idea. Asina Cafe Magic a lanta. Tur tres tabatin algu ku hende ku limitashon i nan a pensa ku na Kòrsou tambe mester tin oportunidat pa algu asina. Tur parti di mundu konosé e konsepto aki di cafe, restorant ku hende ku limitashon ta traha. Ora e tres damanan aki a topa, nan a djòin i awe tin Cafe Magic.

 Ku hopi training a logra 

Awor aki Cafe Magic tin un aña  i mei di eksistensia. Tur proseso na kuminsamentu no ta bai fásil manera ta pensa. Pero el a bai si dor di hopi training, guia e trahadónan/stazjèr ku hopi training i sigur mas ku tur kos pasenshi i amor pa e trabou. Kada bes tabata ripití di un forma agradabel pa nan sinti nan na kas. I asina a trein te ku por a habri.

 Komunikashon tabata mas difísil 

Chanella a para ketu na e lucha mas grandi ku nan tabatin pa trein e persona ku limitashon leve. El a bisa ku no tur ta dominá e parti di kushina, tin nunka a traha den horeka i mester kuminsá for di abou pa bin ariba. I tambe tin e parti ku nan mester tin kontakto ku kliente. Hopi di nan no tin kurashi i ta tímido i apénas ta papia. I awor si wak nan asta mi mester yama nan pa bisa nan ta basta awor. E parti di komunikashon ku kliente ku bin tabata e parti mas difísil.

 Aseptashon 

Mas aleu ora nos ta papia di persona ku limitashon leve, nos tin di papia di e aseptashon dor di e kliente tambe. Hopi hende ta wak nan riba media sosial i ta bai habrí pero tin tambe no sa i a pasa wak e lugá i a drenta. Bo por mira na nan kara i mester  bai splika mesora. Pero ora hasié segun Chanella mesora e hende ta kambia i por wak e sonrisa riba su kara. Ta pidi e kliente pa tin pasenshi i tur hende ku bin einan kisas nan tin di warda un tiki di mas pero nan no ta wòri. Tur ta bai ku un sonrisa riba nan kara.

 Sosten 

Chanella a papia tambe riba e parti di sosten ku nan ta haña òf keda sin haña. El a bisa ku tabatin lugá ku a yuda pasobra nan ta un fundashon. Tabata buskando algun yudansa i a haña pero mester di mas yudansa. E cafe no ta asina konosí ku hende ta bin tras di otro pa nan para riba nan pia. Nan mester di sosten. Chanella a bisa ku lástimamente gobièrnu no ta mira importansia di esaki ainda.

 Hóbennan ku ta traha 

Pa loke ta trata e personanan ku ta traha einan, Chanella a bisa ku 8 ta bini regular i tin ku ta bin kore stazje manera hóbennan di AGO. Na e momentu ei mes tabatin un hóben di AGO ku a bai kore stazje pa 6 luna. Awor aki segun Chanella nan ta trahando ku mas hende muhé pero no ku e ta un eskoho di nan. Pa kasualidat nan tin 2 mucha hòmber i mas mucha muhé. Chanella a bisa ku ta dependé e eskoho di trabou, loke nan por hasi ta kondusí na e hende muhé òf hende hòmber. E parti di kushina hopi bia ta e hende muhé ta dominá mas. Chanella mes tin awor mas di 10 aña trahando ku personanan ku limitashon leve. I e amor ku e ta sinti pa nan ta inmenso. El a bisa nos ku si e por a saka su kurason i mustra kiko e ta sinti, tur hende lo a komprondé e amor ku e tin pa nan.

 Loke ta ofresé 

Kiko tur Cafe Magic ta ofresé. Chanella a konta nos ku nan ta ofresé mainta desayuno. Nan ta habrí di 8 pa 2 i despues tin almuerso, pasta, sòpi di dia, stobá, pan ku mushroom i pampuna den fòrnu, hamburger ku nan mes ta traha, òmelèt, pastechi ku nan mes ta traha, yogurt bowl, tòsti i hopi mas. I banda di esei Cafe Magic tin un kurá grandi kaminda mucha ta hunga. Tambe nan mester ta planta nan yerbanan konsekuentemente e te ta bin fresku di nan mes kurá. Pa loke ta e plantashon, Chanella a bisa nan ta buskando finansiamentu pa traha un Green House pa asina por sigui ku proyekto pa e personanan ku limitashon leve tambe por traha.

 Inklushon 

Kontrali na otro paisnan, aki tin masha tiki lugá ku ta traha ku personanan ku limitashon leve. Cafe Magic ta un di e poko nan segun Chanella. Na Hulanda tin lugá ku ta traha solamente ku personanan ku limitashon leve i tambe tin oro lugánan ku ta meskla e hóbennan aki ku e personanan ku no tin un limitashon. Chanella ta kere ku aki na Kòrsou tambe nos tin di yega einan. Mester yega na loke nos ta pone énfasis riba dje ku ta inklushon. Esei ta e meta di Cafe Magic esta kuminsá einan den e parti di horeka i den futuro por traha den un hotèl òf restorant. P’esei ta trein e hóbennan pa nan ta sufisiente kapasitá. Cafe Magic ta habri di djaluna pa djabièrnè di 8 pa 2.