WILLEMSTAD.- Porfin a kuminsá asfaltá kayanan den barionan di Bándariba. Esaki despues di basta aña ku abitantenan a sufri di hopi molèster di tera i mester biba ku nan kas será i kologá paña labá den kas.
Parlamentario pa partido MFK, Juniel Carolina pa algun aña kaba ta boga pa barionan pariba bini na bùrt. E ta bisa ku e tera no ta solamente un molèster pero e no ta bon pa salú di e abitantenan i alabes e ta daña nan pertinensianan.
Durante temporada di yobida e kayanan di tera ta bira lodo i práktikamente imposibel pa kore riba nan. Pa e motibu aki pues Carolina ta kontentu ku porfin barionan pariba ta haña atenshon.
Entre otro lo sigui drecha Kadushistraat (fase 2). Tambe ta intenshon drecha otro kayanan manera Kaminda Boy Duvert Nicolina, Kaminda Rignald Recordino (di Botika Mampuritu te ku krusada pa bai Kent U Zelf), Kaya Djembe, Kaya Nathan (di Kaminda Hensley Bam Bam Muelens te ku Toko Abrahams), Kaminda Seru Grandi i Cocolodeweg.
Carolina mas aleu ta pidi minister enkargá ku Infrastruktura, Charles Cooper pa den kaso ku no ta logra asfaltá tur e kayanan di tera pa laga Obranan Públiko raspa e kayanan i pone maske ta e asfalt di “vrees” riba esakinan i aliviá e situashon di molèster ku stòf temporalmente.
Finalmente Carolina ta bisa ku miéntras e trabounan ta kontinuá abitantenan di un kantidat di bario mas, tantu na Bándariba komo na Bándabou, ta keda pendiente pa nan kaya yega na turno pa risibí un kapa di asfalt.
