WILLEMSTAD.- CASHA, ku ta e grupo di interes pa empresarionan chikí ku ta traha den e sektor di turismo na Kòrsou, djaluna último a organisá un merkado pa miembronan na Lanthùis Bona Vista. Durante e merkado diferente miembro di e organisashon a presentá nan produkto. Meta di e merkado ta pa miembronan ta sera konosí ku otro i sostené otro den sektor di turismo.
Segun bosero di CASHA, Saskia Ost, e organisashon ta konosé diferente kompania komo miembro: apartamentonan, skolnan di buseo, kompania ku ta hur outo ets. Minister di Desaroyo Ekonómiko i Turismo Ruisandro Cijntje tambe tabata presente durante e merkado. Segun Cijntje turismo na Kòrsou ta hopi diverso. E ta sostené e organisashon CASHA i ta splika ku komo minister e ta orguyoso di representá tur empresarionan ku ta aktivo den nos turismo.
