BEIJING, CHINA, AFP.- China a kontesta e sekretario di Estado merikano Mike Pompeo tokante su afirmashonnan ku e coronavirus a originá den un laboratorio na Wuhan, bisando ku e “no tin ningun prueba” pa esaki.
Washington i Beijing a klèsh repetidamente tokante e vírus, kual a originá na China na final di aña pasa i kual a kombertí den un pandemia global.
Ya tabatin vários teoria indikando ku e vírus a originá den un laboratorio di seguridat máksimo di virologia na Wuhan, pero esaki a wòrdu trese den e lus konvenshonal desde luna pasa pa ofisialnan di gobièrnu.
Pompeo a bisa djadumingu ku tin prueba signifikante ku ta mustra ku e coronavirus nobo a originá den un laboratorio chines. “Mi ta di opinion ku e asuntu aki mester wòrdu investigá pa sientífikonan i dòkternan profeshonal, i no pa polítikonan”, asina el a agregá.
Sin embargo, djárason Pompeo a reiterá su afirmashonnan, pero ku koutela, indikando ku “nos no ta sigur, pero tin prueba signifikante ku e vírus a sali di e laboratorio”.
