BOGOTA, AP.- E presidente kolombiano Juan Manuel Santos a para e negosiashonnan ku Ehérsito Liberashon Nashonal temporalmente despues di vários atake di e gueria, kual a pidi pa drenta den un tregua bilateral mas pa kontinuá e diálogonan.
E atentadonan den vários zona di e pais a tuma lugá algun ora despues di e final di un tregua i tin un reunion inminente ku mester tuma lugá djárason na Ecuador pa negoshá e kondishonnan di unu nobo. Tantu rebeldenan komo gobièrnu a ekspresá nan intenshon di mantené tregua.
“Ineksplikablemente ELN a reanudá su atakenan mardugá, nèt e dia ku nan mester a inisiá un siklo nobo di negosiashon”, asina Santos a bisa den un diskurso kòrtiku na televishon kaminda el a kondená e atakenan. El a para e di sinku siklo di diálogo di pas ku ELN ku mester a tuma lugá e siman aki. “E gobièrnu nashonal semper tabata dispuesto na ekstendé un tregua kue organisashon”, asina el a agregá.
Gustavo Bell, e hefe negoshadó di gobièrnu, lo biaha di Quito pa Bogotá, pa asina “evaluá e proseso” ku Santos. Ounke ainda no ta evidente pa ki tempu e diálogo lo reanudá.
Nashon Uní, iglesia katóliko, miembronan di e sosiedat sivil i gobernadornan di algun di e lugánan mas afektá pa e konflikto a pidi pa mantené suspenshon di aktividat armá entre ehérsito i e grupo rebelde miéntras e partinan ta resolvé e kondishonnan pa sigui ku e kòmbersashonnan.
