WILLEMSTAD.- Norwegian Viva, e barku krusero di mas nobo di e liña krusero Norwegian Cruise Line (NCL), a bishitá Kòrsou riba 3 di yanüari pa promé biaha.
Norwegian Viva ta e di dos barku di e “Prima class” di NCL I a ser entregá 3 di ougùstùs 2023. E barku aki ku a Sali for di Venice, Italia a hasi su biahe inougural riba 10 di ougùstùs 2023.
Komo ku ta promé biaha e barku krusero aki ta bishitá Kòrsou tabatin un seremonia inougural abordo di e barku. Durante e seremonia aki kapitan di e barku huntu ku representantenan di Curaçao Ports Authority (CPA), Ofisina di Turismo (CTB) I nan agente, Maduro Shipping a hasi interkambio di plakat.
Riba e dia aki tabatin banda di Norwegian Viva, tambe Carnival Vista I Marella Voyager den Puerto di Kòrsou. Esaki ta nifiká ku pa di dos dia konsekutivo tabatin mas ku 10.000 turista krusero riba nos isla.
Norwegian Viva ku a mara na Megapir Tula a bishitá Kòrsou ku un kantidat total di 3.616 pasahero a bordo.
Carnival Vista ku a mara na Megapir Ernest Jackie Voges tabatin un total di 4.569 pasahero a bordo.
Marella Voyager ku a mara na Matheywerf a bishitá Kòrsou ku 1.903 pasahero a bordo.