WILLEMSTAD.- Wes a honra daño perhuisio di 800 florin na un víktima ku su outo a keda destruí pa su pareha.
E akusado no a presentá den sala, pa responsabilisá su mes pa su akto.
Segun deklarashon di e víktima, e akusado a manda un baranka di piedra riba su vehíkulo kibra su lusnan di outo i tambe su winshil.
Tabatin vários testigu ku a deklará di a mira e akusado tira e vehíkulo ku piedra, durante un diskushon ku e hòmber tabatin ku su pareha.
Segun e deklarashon di e akusado na polis, e ku e víktima tabatin un diskushon di kual esaki a sali fo’i man. Dado momento e dama a push’é den su kara, pa despues koba su mama i yam’é ‘homo’ dilanti vários hende. Esei a pone ku el a bira furioso i a pasa e dama e wanta. E dama a kore bai i a sigui yam’é tur tipo di palabra di insulto.
Esaki a pone ku el a rabia mas tantu, bai pafó kue un baranka di piedra i manda riba vehíkulo di e víktima ora ku e tabata bayendo. Segun e akusado e palabranan ku e dama a papia a poné rabia asina tantu ku a pone ku el a sali fo’i su kueru i hasi loke e no mester a hasi.
Pa loke ta trata e wanta, e akusado a deklará na polis ku e no a dal e dama dje duru ei i ku e sla no a hasié niun daño ni laga marka atras. E dama no a risibí niun kap ni a keda frakturá.
Fiskal a haña e akusashon kompletamente probá i a bisa ku e akusado ta keda demandá na 1 luna kondishonal i e mester paga 800,- florin na daño perhuisio pa e sla di e outo.
Wes den su desishon a haña e akusashon probá i a bai kompletamente di akuerdo ku e petishon di fiskal.
