WILLEMSTAD.- Ayera den oranan di mardugá, deskonosínan a trata na pega un vehíkulo marka Mercedes Benz den Bargestraat na kandela, dor di basha un líkido flamabel riba dak i tambe porta di e vehíkulo.
Un persona ku tabata den bisindario, a tuma nota di un hòmber deskonosí ku a trata na kometé e echo aki. El a kore sali pafó pa evitá ku e outo ta pega na kandela.
Despues ku e hòmber a mira ku el a ser deskubrí, el a kore bai. E malechor no por a logra pega e outo na kandela, pero e líkido ku el a basha riba e vehíkulo a hasi daño tantu na e dak komo porta di esaki.
E doño ku tabata na kas na e momento ei, a sali pafó mesora pa tuma nota kiko ta pasando.
Polis a presentá na e sitio i ta bai kontinuá ku e investigashon pa saka afó ken por ta esnan òf esun ku a trata na kometé e echo kastigabel aki i tambe e motibu.