ORANJESTAD.-Polis di Aruba ta informa ku den oranan di mardugá a sosodé un aksidente riba e kaminda di Tanki Leendert. E aksidente aki a resultá fatal pa un persona. Tabata mas o ménos 02:16 di mardugá ku sentral di polis a haña informashon di un aksidente basta fuerte ku a kaba di tuma lugá riba e kaminda menshoná. Tabata un aksidente entre dos outo di famia, un Mitsubishi Lancer numerá A-18711 i un Toyota Starlet numerá A-70492.
Na yegada di e promé patruya a konstatá ku e shofùr di e Starlet a keda transportá pa konosínan pa hospital. Polis di tráfiko a presentá huntu ku polis tékniko pa hasi e investigashon nesesario. Mas lat, 03:02 di mardugá dòkter Duijzer a konstatá morto di George B. Hassell kende ta nase na Aruba di 25 aña di edat, 03:20 fiskal di Ministerio Publiko a konfiská e kurpa sin bida.
