CMC tin kapasidat pa operá mas ku 7.000 pashènt pa aña
WILLEMSTAD.- Pa aña tin mas o ménos un 58 mil pashènt ta pasa na CMC pa un promé sita. I despues di esaki e sitanan ta bira un 96 mil pa ripitishon. I esaki por ser konsiderá komo un volúmen di kuido sumamente haltu. Pa loke ta e parti di operashon tin 6.185 pashènt a ser operá, aunke no ta esaki a e kapasidat máksimo di CMC. Si konsiderá ku CMC tin 7 sala di operashon, e 6.185 ta representá un 85% di uso di e kapasidat di salanan di operashon. Segun kálkulonan, CMC tin e kapasidat di por operá mas ku 7.000 pashènt pa aña. Esei di akuerdo ku e direktor General di CMC, drs. Gilbert Martina, durante un presentashon ku el a duna den Parlamento di Kòrsou e siman aki.
Segun sr. Martina, si e tin di wak e volúmen di pashèntnan ku ta pasa den e mulina di CMC, tin un 60 mil hende ku tin sita nobo, un 100 mil sita pa bini bèk, kasi 20 mil pashènt ku ta ser atmití pa kuido, un 6 mil operashon, i 21 mil bishita na e Departamento di Emergensia, loke den boka di pueblo ta yama Poliklínika. Segun sr. Martina esaki ta un punto di atenshon hopi serio, pa motibu ku por nota ku un gran parti (60%) di pashèntnan ku ta presentá na e departamento aki ta hendenan ku ta tuma e inisiativa di bai riba nan mesa, pues sin referensia di dòkter di kas òf spesialista. Pero di e grupo aki un 2/3 parti ta bai kas bèk. Esei ke men ku tin di pone mas atenshon na nos kuido primario aki na Kòrsou. Hopi dje kehonan aki ta kosnan ku por akudí kuné serka dòkter di kas.
Mas aleu sr. Martina a dediká atenshon na e kantidat di kehonan ku a drenta na CMC, den e kuater añanan di operashon na Kòrsou e kehonan tabata 501 na 2020, 287 na 2021, 364 na 2022. Kompará ku e volúmen di pashènt ku ta akudí na CMC, esaki ta un porsentahe relativamente abou.
Midi satisfakshon
Segun sr. Martina a kuminsá ku un proyekto pa midi satisfakshon di pashèntnan for di aña 2022. A hasi esaki via di e-mail, i por nota ku e rèspòns ta di 3%. Por nota ku na poliklínika di 3.161 pashènt, for di un volúmen di 100 mil pashènt, nan a duna un 8.1 pa e servisio ku nan a risibí na poliklínika.
Den e kuestionario, tur pashènt por a indiká kiko ta e partinan di servisio ku e ta haña bon i a marka esakinan ku un +, i esnan ku tin di drecha el a marka ku un -. Hopi a indiká ku nan tin konfiansa den e dòkter, miéntras ku entre e puntonan di atenshon a resaltá e tempu di espera pa un sita, i falta di informashon riba efektonan sekundario di remedinan. Pero segun Martina, ta puntonan ku CMC ta trahando riba dje pa ser mehorá.
