Nathan de Lanoy

Nathan de Lanoy ta propietario i direktor di ZOH, un restorant den sentro di Punda ku luna pasá a selebrá su promé aña.  Nathan ta pone hopi atenshon den Horeka i e servisio ku e ke pa e kliente/bishitante eksperensiá. Nathan sinembargo no a kuminsá den horeka. El a konta nos ku el a kuminsá su karera den mundu finansiero. El a studia na UNA den akountent i despues di algun aña trahando el a disidí di bai den direkshon di horeka. Einan e aventura a kuminsá. E ta habri su mes restorant ku e vishon pa elevá e konosementu di Kòrsou komo e trahadónan. E ke mira e hendenan ekselá den diferente área, no den kushina so pero traha den e sektor turístiko, e habilidat pa dil ku turista di tur klase i duna mas di Kòrsou pa e produkto nashonal.

Den kushina fo’i chikí

El a konta Djasabra kiko a inspir’é pa el a hasi e kambio asina drástiko di e mundu finansiero pa e mundu di turismo. E yamada a kuminda tempu e ta chikí. For di su 5 aña  e ta sigui su wela i tata grandi den kushina i e tabata wak tur kos ku nan ta hasi i yuda kaminda por. Ku 8 aña el a siña stoba su mes kuminda manera un kabritu, kònkòmber stobá, ku pasenshi di laba e berduranan, kòrtamentu wela tabata hasi pero tur loke ta por ehèmpel laba un kònkòmber e mes tabata hasi. E tabata para riba un stèp banda di su wela i siña tur kos. Einan e amor a kuminsá pa sirbi. Ounke el a bai den otro direkshon ku su estudio pero su soño a keda kushina/horeka i sektor di turismo.

Siña pa kòki

Nathan a sigui splika ku e no a kuminsá bai pa siña pa kòki pero e ta kere un dia e lo hasié. E ke bai un skol internashonal den kòki pero e tempu no a yega. Awor e ta konsentrá mas riba e parti di manehá. I esei ta loke e ta hasiendo ku su mes restorant ZOH den Punda i dirigí e personal pa e loke ta su vishon esta duna bon servisio.

Duna servisio a bai dilanti pero falta mas

Tempu ku Nathan a drenta e sektor di Horeka te ku awor e ta haña dunamentu di servisio a bai hopi dilanti. Kompará  ku 10 aña  pasá Kòrsou a dal hopi stap dilanti. A elevá e tipo di restorant ku tin tipo di hotèl i nos ta kresiendo. Loke ta sinti falta di dje ta e tòp manera Sandals a ferwaktu di Kòrsou ora el a bin aki. Loke el a spera ta muchu mas di loke Kòrsou tin di ofresé i esei si ta algu segun Nathan ku tin di traha riba dje. Pero no mester servisio komo algu ku nos ta rebaha nos mes. Servisio ta un amor pa duna un kliente ku a sali su kas òf hotèl. El a hasi su eskoho pa bin serka bo i mester lag’é sinti ku e ta bon biní. Henter e forma ku ta traha e kliente ta konta i no lag’é sinti ku ta interesá di loke el a bin komo òf bebe pero kombersá i laga e kliente sinti ku ke hasi su eksperensia na Kòrsou mas plasentero. Nathan ta wak kiko por nifiká pa e hende i no solamente pa un dushi anochi pero muchu mas ku esei.

Duna servisio no ta un menospresio

Nathan ta konsiente ku tin di traha duru pa kambia e forma di pensa di nos hendenan komo si fuera ku ora sirbi ta bo kriá mi ta, e pensamentu di tempu di katibu etc,. etc. Nathan ta kere den e ‘Lead by Example’ pa e kambio. Den su organisashon e ta mustra e trahadónan ku e mes ta dispuesto na hasi tur trabou. No tin un trabou ku e mes no ta hasi. E ta mustra asina ku e no ta sintié mas ku otro dor di ta na kabes di e organisashon. E ta duna e ehèmpel ku e mes ta kana piki kos abou si mester, e por yuda laba kos si mester, e por yuda kòrta kos si mester i tur esei e ta hasi pa e organisashon por bai dilanti. Den e organisashon nan lema ta ku ta bai laga tur kos mas mihó ku nan a hañ’é. Si e yega i mira un tiki stòf e ta sòru limpi’é pa e siguiente haña e mesa limpi. Tur hende ta partisipá pa e produkto ku nan ta presentá ta di kalidat, Pa loke ta e trouma ku nos pueblo a keda kuné di sklabitut i sirbi ku ta baha bo mes, ta un tema ku tin di toka i enfrentá otro di dje. Si bo no ta konsiente di dje bo ta kai lihé den dje. Servisio ta hende ta sali for di su kas i bo ta yam’é bon biní, dun’é servisio i fasilitá pa su anochi ta mas plasentero. I si den e proseso ei bo ta sinti ku bo mes a menospresiá e pida ei, di niun manera por laga e hende sintié balorá serka bo. I esei e ta papia hopi den reunionnan kada dos luna i mustra riba e partinan importante di kiko ta servisio i kiko ta para pe.

Yu Kòrsou ta talentoso di naturalesa

Nos yu di Kòrsou ta talentoso di naturalesa, pero e tin un problema di disiplina. E yu di Kòrsou tin problema di konsistensia i no ta pasobra el a hasi e kos un bia ta bon i ta kla. “Tur dia mi tin di ferwaktu e bon bira mihó i mester keda traha ariba”. I esei Nathan ta sinti falta di dje na Kòrsou. E 6,5 ta bon i no ta traha pa e 9 òf 10. Mester keda kòrda i kai den ripitishon i keda bisa mesun kos pa al final  e kos drenta e kolega pa e bib’é. I ei ta atrobe duna e ehèmpel, ku nos ta hasi tur kos kada dia. Si nan mira e lider ta hasié ta ken e ta pa bo hasié. E ta kere Kòrsou tin hopi talento pero hopi di traha pa e parti di disiplina i ta disponibel pa siña. No ta pasobra  ba traha na tal kompania na e otro bo sa tur kos. Kada un tin su mes identidat i regla. Nos mester ta habrí pa kambia i no pensa ku bo no mester di sa nada. Por wak senarionan ku pa nos krese komo pais nos mester ta mas habrí pa sigui siña.

Un skol di siñansa

Nathan no tin miedu di siña e trahadó i ku despues esaki por bai otro kaminda. El a bisa ku e tin un Open door Policy pa drenta i sali. E vishon di e kompania ta bai ku nan ke pa ora e hende sali di e kompania aki e ta mas desaroyá ku ora el a yega. E ta importante ku e trahadó a bin un skol di siñansa i ora e bai otro kompania e hende mes ta puntra ta unda esaki a siña. Tiki tiki ta elevando mas hende pa e trayekto ku e ke bai den dje. Tin hende esaki no ta kuadra ku e pensamentu ku e persona a kustumbrá pa traha i ser honesto ku si e trabou i e trabou su kultura no ta fet, e por ta habrí. Nan ta masha stret i nan ke hasi kambio pero e hende mester por ke kambio. Tin ora e hende no ta sinti ku e mester di kambio.

Kompartí konosementu

I ki tur e konosementu ku Nathan tin e ta habrí semper pa kompartí esaki ku logronan. El a bisa nos ku e tin kontakto ku otro restorantnan i personanan den horeka. E ta kere den kompartí konosementu den e kaso aki kiko por siña otro i siña otro loke nan sa. El a haña su konosementu dor di biaha i konosé mundu. E sa kiko e trato ku e hende a duna bu a pone bu sinti i kiko bo ta ferwaktu komo kalidat i esei e ke pa su klientenan. E ta kolaborá ku otro restorant pa hasi interkambio di idea. Ounke na Kòrsou tin bia hende ta un tiki kouteloso pa informashon i pa duna esaki pero pa Nathan loke ta importante ta pa e produkto Kòrsou por bai dilanti. No mester inventá e wil, e eksperensia pa e turista mester ta mihó.

Mi Deseo

Nathan su deseo ta ku Kòrsou no ta solamente un destinashon di playa, pasobra nos sa kuantu talento nos hendenan tin, kon bon  mayoria hende por ta den e área kulinario di Kòrsou i e produkto aki mester keda eksportá mas tantu. No bin Kòrsou pa laman so pero diversifiká mas loke ta ofresé. Nathan ta kere den turismo i nos futuro di horeka ta den un ‘booming’ pero traha riba kalidat i konsistensia. Esun ta bisa e otro i mester kumpli ku e espektativa ku e hende ta bin kuné. Hasi e trabou tur dia di nobo mas mihó ku bo por. Nathan ta kere den krese balansa, e ke stabilisá su mes i ora e tin e stabilidat e por ekspandé su alanan ku negoshi pafó di Kòrsou. I pa Nathan servisio ta mas importante ku e kuminda. Un kliente ta bai bèk pa un bon servisio i e kuminda averahe pero e no ta bai bèk pa un bon kuminda i un servisio defisiente.

ZOH

ZOH ta konsentrá den kombinashon di smak lokal i téknika franses. Por ferwaktu hopi riba presentashon, smaknan kontradesí i bai ku otro i  kolónan vibrante den kuminda.