Djasabra 30 d sèptèmber, awe, Ghislain Berends lo kana di ost pa wèst, den kuadro di konsientisashon kontra di Bullying, abuzu di mucha i violensia doméstiko. Ghislain a kompartí ku nos di Djasabra su historia dikon e fundashon meta di e kanamentu di awe djasabra 30 di sèptèmber.
E fundashon
Ghislain a konta nos ku e fundashon Children Welfare Foundation a keda lantá na 2009 dor di su tata Freddy Berends (qepd). Despues di 2012 ora su tata a fayesé e fundashon a kontinuá kuné. Na 2021 Ghislain a hasi un proyekto pa Ronald McDonald House dor di subi seru Kristof 52 bia, riba tur djadumingu pa un aña largu. Riba e di 52 bia te na tòp di e seru el a wak di ost pa wèst i a pensa pa hasi algu. E tabata sa kiko pa e hasi pasobra ta un proyekto ku ta afektá e mes pero kiko presis e no tabata sa. Dado momentu despues di algun luna el a tuma e eksperensia tempu e tabatin 14 aña na Suisa ora el a keda di Bully pa 8 luna largu i a disidí di kore di ost pa wèst.
Kibrando kabes kon e ta bai hink’é den otro, el a disidí ku e ta bira algu simbóliko pa e konsientisashon kaminda e ta kuminsá na Ostpùnt di Kòrsou na momentu ku ta skur. E motibu di esaki ta tempu e tabata keda tentá, sin yudansa, e tabata keda malusá, e no tabata sa unda pa pidi yudansa i p’esei e ta kuminsá na Ostpùnt. I ora e kore e ta yega mas riba e mundu kaminda tin bida ta nifiká ku e hañando mas yudansa i pa e yega te na Watamula, kaminda un mundu nobo ta kuminsá.
Un komienso nobo
Nos no ta papia aki di un komienso pa un final pero un komienso pa un komienso nobo (start pa nieuwe start) manera Ghislain a splik’é. Loke Ghislain a pone énfasis riba dje ta un mucha ku ta wòrdu tentá, maltratá ta kai den un buraku asina skur, su so, e no sa kon e mester sali. Den su kaso el a sali i e ta konsientisá tur hende pa dia 1e di òktober pa 8 or di mainta ora e yega Watamula pa dun’é ánimo, pasobra asina ta duna ánimo na tur mucha ku ta den e situashon similar aki.
No Mishi
No ta un fundraising, pero segun Ghislain e ta den kolaborashon ku SOAW i Hustisia, sektor privá i asina huntu ku e fundashon a yega na e proyekto di No Mishi. Ora e kaba di kore, e komienso nobo e ta duna e stòki simbóliko na gobièrnu ku ta bai start i kontinuá ku e proyekto. E fundashon mes ta purba yuda i ounke mester di sèn, si gobièrnu bin ku proyektonan kisas pa mayornan kon pa dil ku e situashon ora nan yu ta keda tentá, Children Welfare Foundation lo por yega na e fondonan pa yuda pa ku esaki i den e kuadro aki hende por hasi donashon.
Konsientisashon
E korementu di ost pa wèst ta mas bien un konsientisashon kontra di Bullying. Pa e mes tambe esaki ta un terapia di loke a pasa kuné. Loke el a pasa aden, tempu e tabata chikí bibando na Suisa tin su efektonan ainda riba dje. Segun Ghislain e subimentu d Kristofel a yud’é hopi. Nunka el a papia di loke a pasa kuné. El a papia ku su mama 2 luna pasá numa. Awor aki si e ta papia abiertamente di loke a pas’é na Suisa i e sentimentu aki el a logra kambia danki na e subimentu di Kristofel.
Tentá pa 8 luna largu tur tur dia
Ghislain a nase na Kòrsou i ku 7 aña el a bai Suisa ku su mama i ruman. Tur kos tabata bayendo bon pero e ta kòrda ku riba un djaluna el a bai skol, i e kos a kuminsá ku 2 pa 3 mucha ku a kuminsá tent’e i despues mas i mas muchanan tabata ba mas i e ta kòrda 35 mucha. E tabatin amigu pero den e proseso aki e amigunan a djòin e grupo ku ta tende pa asina evitá ku nan tambe ta wòrdu tentá. I asina tur tur dia Ghislain tabata bou di tentamentu. Esaki ta riba kaminda pa skol, na skol mes ounke nan no a mishi kuné pero a kibra su baiskel, tira su paña afó ora e ta den gym. Di un mucha kontentu el a bai den e lugá skur. El a sera su mes den kamber, e no kier a hasi nada mas, te el a subi e dak di e kas di su mayornan. Komo e ta basta fuerte, su mama a bin kas i a wak e pero nunka a puntra dikon el a subi e dak, te 2 luna pasá ora Ghislain a bai Suisa el a kont’é. E mama a sintié kulpabel pero el a bisa su mama no sintié kulpabel.
No tene bèrgwensa, papia
Hopi hende tabata puntra Ghislain dikon e no a bisa mas tempran kiko tabata pasando kuné pero ku 14 aña i tentá i bo bai serka mama òf tata, nan ta bai skol nan ta papia i e kos ta bira pió. Pero e ta kere mihó el a hasié pasobra si nan a tuma akshon kisas e tentamentu lo tabata ménos. E ta animá tur mucha, tur hende grandi tambe ku por ta wòrdu tentá na trabou. E ta pidi pa no tene bèrgwensa pero papia ku un guia, un sikiater. No pensa ku ta “machu” bo ta i no ta hasié pero buska yudansa.
Motibu
Ghislain a keda puntra hopi bia di e motibu dikon e tabata keda tentá. Kisas pasobra el a bin di Kòrsou pero segun Ghislain, e tin wowo blou koló habrí ke men nan no por a sa ku e ta di Kòrsou sin mas. E ta kere ku e tabata un di e chikínan na skol i e tabata esun mas fásil. El a asta aserká algun di e gainan dikon nan a tent’é pero nan no por a dun’é un motibu. Nan ta bisa ku nan tabata fèrfelá nan mes pero esei no ta e kontesta ku Ghislain tabata buska. No tabata su falta.
Papia abiertamente
Kiko Ghislain ta hasiendo pa yuda otronan. El a bisa ku e no por kambia mundu pero e por dirigí kampañanan manera No Mishi. E ta bai entrevistanan i ta papia abiertamente. E ta papia habrí ku su yu pasobra algun luna pasá e yu tabata den un situashon na skol. Si un yu ta bin kas i bisa ku e ta wòrdu tentá kisas pa un tshirt òf kèts mester aktua. Den su kaso ora e yu a bis’é el a bai skol mesora. El a bai serka e kabes di skol i nan a papia ku e otro mayornan. Awor e yu ta bai skol felis. E otro muchanan a bisa algu kisas nan no sa ku nan a tenta e yu. Awor nan ta bon amigu i nan ta papia ku otro i p’esei e ta pidi mayornan pa tuma akshon mesora.
Ehèmpel pa e mucha
Un influensia hopi grandi riba muchanan ta media sosial. Ghislain a splika ku un mucha ta tuma ehèmpel semper serka su mayornan. Si e lanta wak su tata ta tenta e tambe lo hasié. I p’esei e fundashon i gobièrnu ta besig ta trahando i ke traha den direkshon di mayornan tambe. E por yuda e mayornan kon ta atendé ku e situashon i pa wak kiko komo mayor bo ta hasi na kas pa no aktua asina. E mayor ta ehèmpel di e yu pero di otro banda e mucha na skol tambe por keda influensiá. I ta importante pa e maestronan tambe haña tayernan pa sa kon ta atendé ku e situashon. Esaki pasobra bullying ta bai hopi leu. Si un mucha ta keda tentá tur dia, e ta krak e mentalmente.
Pa Ghislain no por bisa kua ta pió pa atendé kuné esta Bullying, abusu di mucha òf violensia pasobra tur ta inakseptabel. Un mucha mester tin un bida bon. Trata un mucha pa e tin un bon futuro. Si krak e mucha, ta kon e futuro lo ta. E tentamentu no ta na Kòrsou so i tampoko ta pa hende di klase medio òf mas haltu so, pero e ta algu rònt mundu ku ta sosodé den tur famia.
Sostené e proyekto
E evento di awe dia 30 ta kuminsá na Ostpùnt i esaki danki na Famia Maal ku e por usa nan tereno. Ta 15 kilometer e tereno ei ta. E ta kuminsá den kareda di 8 pa 9 or di anochi. Promé Ghislain kier a kore mas den dia pero ta asina kalor ku e mester kore anochi. E ta kore e tereno di famia Maal, bai Sta Rosa, Gosieweg, Winston Churchillweg, Zegu i sigui bai Watamula i ke yega 8 or di mainta djadumingu 1e di òktober. Den e último 500 meter su yu lo kore kuné. Esei ta e úniko persona ku ta permití pa kore kuné riba e dia ei. Ku esaki Ghislain a bisa ku no ta permití pa niun hende kore kuné. Na Watamula ta e komienso nobo i e ta entregá e stòki na minister. E ta spera ku lo tin hopi hende ku lo tei einan pa sostené. E lo keda kompañá pa dos baiskel i tambe pikòp pa kompaña te final. Ghislain a trein un aña largu i a kore basta. Ta un esfuerso ku un mucha ta hasi tur dia pa sali for di e skuridat. Tin spònser pa kada kilometer ku e ta kore i tur donashon ta bon biní. E nr di kuenta na Banco di Caribe ta 34700301. E donashon ta bai pa Children Welfare Foundation pa nan por atendé ku tur e proyektonan ku tin.
E hazaña aki ta kuminsá dia 30 di sèptèmber 2023 i lo terminá 1e di òktober 2023.
E fundashon tin un página di Facebook kaminda por mira i tuma nota di aktividat di e fundashon.
Tin un number di kuenta tambe na Banco di Caribe pa esnan ku ke aportá finansieramente. E nr na BdC ta 34700301. E fundashon ta dediká parti di e fondonan na kampaña di konsientisashon huntu ku gobièrnu den un public private partnership (PPP) pa e ta kargá pa komunidat kompleto.
