WILLEMSTAD.- Dia Mundial di Salú ta un dia mundial di konsientisashon di salú i ta selebrá esaki tur aña riba 7 di aprel, bou di patrosinio di e Organisashon Mundial di Salú (World Heath Organisation), i otro organisashonnan relashoná.
Ta selebrá e dia ku e propósito pa promové salú komo un derechi básiko i universal, aksesibel pa tur hende den e diferente regionnan di mundu. P’esei a skohe komo tema e aña aki: Mi salú, mi derechi.
Kòrsou ta selebrá Dia Mundial di Salú Den e kuadro di esaki, Ministerio di Salubridat ta reflehá riba un par di mehorashonnan ku a bin ta realisá e último tempunan den kuido relashoná ku e tema di derecho riba salubridat.
Entre e logronan aki ta inkluí e habrimentu di ‘huisartsen post (HAP)’ nobo pa brinda atenshon mas aksesibel na poblashon den oranan pafó di ofisina.
Ademas, a logra redusí e lista di espera pa operashonnan di katarata na wowo, dor di otorgá pèrmit na hospital Advent pa amplia nan grupo di spesialista, loke ta redusí kehonan di pashèntnan i ta drecha kalidat di bida di pashèntnan despues di operashon.
Otro logro ta e introdukshon di operashonnan na rudia ku ta tuma lugá na e hospital nobo, Curaçao International Clinic, kontribuyendo asina na mehorashon di kalidat di bida di e pashèntnan. Mas detaye den edishon di EXTRA.