Eunice Cijntje Lucidity Communication; Komunikashon den un mundu digital

Despues di basta tempu, e programa di Djasabra ta risibí Eunice Cijntje di Lucidity Communication atrobe den e programa di Djasabra. No ta ni e promé ni e último bia ku e ta forma partí di Djasabra su diálogo, i semper ta un plaser pa papia kuné. Eunice semper ta trese un perspektiva moderno, i ta papia di desaroyonan manera digitalisashon, outomatisashon i naturalmente di e tópiko ku ta reina aktual: inteligensia artifisial. Tópikonan ku ta forma parti integral di nos futuro. E ta kombiná e mundu kaminda teknologia ta kambia tur dia, i e aspekto mas importante, komunikashon humano.

Lucidity Communication

Lucidity Communication ta un grupo di konsultornan ku a spesialisá den guia i tayer di inovashon i kresementu stratégiko empresarial, ku un enfoke spesial riba muhénan i liderato femenino. Igual ku mundu ta kambia, e organisashon mes a kambia, i a haña un ruman muhé chikí, un parti nobo di Lucidity ku ta buska balansa entre e ser humano i teknologia.

Eunice ta splika ku hopi bia, ora nos ta trata di “keep up” ku e ritmo di progreso teknológiko, nos por pèrdè e transmishon humano den dje. “Nos mester haña e balansa entre ‘tech’ i ‘touch’,” e ta bisa ku un sonrisa. E kompania, ku ta eksistí ya pa 13 aña, a enkaminá un biahe inspirativo. Eunice ta rekordá ku resientemente, den un pènel di diskushon, e mes a keda asombrá ora el a realisá kuantu aña a pasa. “Ta un proseso,” e ta bisa. “Tin dia bo ta lanta sin gana, pero tin otro dia ku bo ta yená di perseveransia.”

Lucidity Communications a kuminsá na 2015 komo un spesialista den komunikashon digital. Den 2022, el a pasa pa un transformashon importante, i a evolushoná pa bira eksperto den ‘Extended Reality’ (XR) i ‘Metaverse’. Su mishon ta pa krea un impakto real, ku ta enfoká riba edukashon di ‘Metaverse’ pa hóbennan, individuo ku ta buska relashon òf bienestar, i negoshinan ku ke nabegá den e mundu di XR i ‘Metaverse’. Eunice ta bisa, “Lucidity ta e lus ku ta guia bo den e mundu di Web3 i e universo di e ‘Metaverse’.”

Eduká i implementá

Lucidity ta operá den dos nivel prinsipal: edukashon i despues implementashon. Despues ku a evaluá e situashon di e kompania i pasa dor di e proseso, Lucidity ta enfoká riba e ‘Why’, dikon, i despues e ‘How’, kon. Eunice ta menshoná ku si un kliente kier haña mas kliente, pero internamente e proseso no ta efisiente, mester drecha e base promé pa logra e efekto deseá. Lucidity ta studia e problema, analisá diferente trayekto ku por keda implementá, segun loke e kliente ta deseá. e organisashon por drecha un proseso kompletu, un sistema, i tambe duna entrenamentu. Si un kliente invertí den un proseso nobo, pero si e empleado no ta konfortabel kuné, e implementashon no ta logra e resultado ku e kliente ta deseá. E ora ei, bo no ta haña e ‘Return on Investment’ i bo produktividat no ta oumentá. Pa evitá esaki, Lucidity ta ekipá e empleado pa e sintié konfortabel ku e proseso nobo, asina nan por hasi uso di dje mas mihó i e kompania por mira e efekto real. Den práktika, hende ta kontaktá Lucidity pa drecha nan sistema interno. Nos ta skibi un dokumento detayá huntu ku su konklushonnan i rekomendashon pa drecha e situashon i optimalisá e trabou.

Mi tabata falta algu

“For di e momentu ku nos a kuminsá, komunikashon semper tabata e punto sentral,” Eunice ta konta. Na prinsipio, e enfoke tabata pa yuda organisashonnan drecha nan komunikashon, tantu interno komo eksterno. Den e kuadro aki, Lucidity a kuminsá manera un plataforma ku tabata spesialisá den merkadeo digital i komunikashon digital, prinsipalmente riba e parti teknológiko di e mundu moderno.

Pero aún asina, Eunice no tabata kompletamente satisfecho. “Mi tabata bisa mi mes ku falta algu. Mi tabata purba ideanan nobo, pero niun no tabata bai bon den praktiká. Mi a mester para un tiki i realisá ku mundu no tabata kla pa esaki ainda.”

Eunice a disidí di bai Hulanda, kaminda el a hasi su estudio di Master in Innovation, un eksperensia ku e ta bisa ku “a habri su mente i henter un otro mundu.” Despues di su regreso na Kòrsou, el a kuminsá ahustá tiki tiki e rumbo di Lucidity, di kual el a integrá su pashon i su vishon na e ritmo di isla. “Pero awor, despues di 13 aña di eksperensia, trabou duru i refleho, mi por bisa ku e vishon ku mi tabatin den mi kabes, finalmente a bira realidat. I mi ta sumamente kontentu ku e direkshon kaminda Lucidity ta bai.”

Eunice su pashon

Eunice ta konta ku su dos pashonnan prinsipal ta teknologia i bida. Segun e, pa logra un balansa real, bo mester komprendé ku teknologia por yuda bo, pero komo ser humano, nos no por laga e dominá nos bida. “Dor di mi pashon, mi a bai den den e mundu digital sin paga tinu. For di e eksperensia akí, mi a krea un Niche nobo,” Eunice ta splika.

E ta enfatisá ku den merkadeo digital, bienestar i salubridat, hopi hende no ta pone atenshon na e aspekto humano. “Nos ta dediká mayoria di nos tempu na kreatividat, pero nos ta lubidá salubridat,” e ta agregá. Nos mester di teknologia, pero nos mester balans’é ku bida personal i negoshi. Pa e, e balansa real ta ora bo integrá bo bienestar ku e inovashon digital, pa krea un manera di traha i biba mas sano i produktivo, dor di krea espasio pa bo mente por proseso. Esaki ta loke Eunice ta enfoká riba dje “bridging the gap between humanity and technology.”

Ki ora bo mester tuma espasio

Ki ora mester tuma espasio? Eunice ta bisa ku esaki ta totalmente personal: bo mes mester determiná kiko ta hopi pa bo mente i kurpa. Por ehèmpel, bo por skohe pa no traha mas ku tres ora kontinuo dilanti di un kòmpiuter. “Bo ta buta bo barera, ki ora ta bo espasio,” e ta splika. Ku teknologia tambe bo por hasi bo hòbi, pero bo mester ta konsiente ku hopi ora tras di un pantaya no ta bon. Bo kurpa mes lo indiká ora bo a pasa bo límite, i bo mester tuma e señal akí na serio. Bo por kombiná kreatividat i produktividat ku teknologia, pero semper sin lubidá bo espasio personal i bo salú.

Konsientisá pueblo

Eunice ta bisa ku globalmente, teknologia ta krese rápido, e salubridat ta un di e tópikonan ku ta hopi relevante den e prosesonan akí. Eunice te menshoná ku “It is all about educating.” Ku mester eduká hende grandi, mucha,iI e grupo meimei riba e parti bon i e parti malu di teknologia.

Eunice ta sigui splika ku hopi bia nos ta enfoká riba e parti bon i lubidá di evaluá e konsekuensianan. Pa un empresario por ehèmpel, e situashon ta meskos, bo ta preshoná bo mes riba resultado i ganashi, pero si bo lubidá di buta límite o pone atenshon riba bo bienestar, e riesgo ta un “burnout.” Tur dia, wikènt i den siman no tin diferensia. Pa dil ku e problema akí, Eunice ta usa diferente método manera un skema ku ta definí rutina di su dia. Por ehèmpel, mainta trempan bo entrená, meimei bo ta hasi algu pa distraí, i despues di trabou purba buska un ora pa deskonektá. Esaki ta importante pa bo sirkulashon di sanger, bienestar i produktividat. Eunice ta rekomendá pa kada persona dediká mínimo 10 ora pa siman pa nan mes, pa tene balansa entre teknologia i humanidat.

Digitalisashon

Eunice ta splika ku e ta kontentu pa bisa ku Kòrsou ta sigui habri pa digitalisashon. Tur dia, organisashonnan ta traha mas i mas pa yega un nivel mas haltu di adaptashon digital. Tin hopi konferensia, seminario, i kurso, miéntras ku gobièrnu tambe ta desaroyá nan plan stratégiko pa implementashon di teknologia. Pa ministerio i skolnan, e oportunidat pa eksplorá teknologia ta hopi importante. Nos komunidat a kuminsá bira mas global, i si bo no adaptá na e merkado, bo ta keda stanká. Den skolnan, e inisiativa pa integrá digitalisashon ta algu grandioso pa mira, i pa duna tur hende e espasio pa eksperimentá i siña ku teknologia. Eunice ta enfatisá, ku aunke adaptashon ta importante, konsientisashon i limitashon ta fundamental. E mester keda algu positivo. Ta bon ku tin un tim ta introdusí teknologia, pero ku enfoké riba bienestar i balansa.

Áreanan imposibel pa digitalisashon

Eunice ta bisa ku den mundu digital i teknológiko, tur kos por outomatisá. Segun e estudio ku el a lesa, e abilidatnan den tòp 5 ku ta mas relevante pa futuro ta den e área ta pensa kreativo. Ora bo dominá e abilidat ei, tur kos ta posibel pa por implementá.

Eunice ta agregá ku e kosnan mas chikí por keda outomatisá, pero e talento humano manera pensa krítiko, solushoná problema i inovashon, no por bira 100% digital. Den e lista ku el a lesa, pensa krítiko ta na lugá 6 te 10, demostrando ku e manera ku bo ta pensa kognitivo ta fundamental pa komprendé i usa teknologia den un manera efektivo.

E punto ei ta importante pa kompania i personanan: digitalisashon ta un hèrmènt, pero e inteligensia humano ta esensial pa direkshon, evaluashon i inovashon.

Dikon kambia

Eunice ta splika ku e miedu ta mas basá riba e idea di “dikon mi mester kambia?” i no riba realidat tékniko. Hopi empleado tin e pensamentu ku, “mi tin 10 aña ta hasi e trabou di e manera akí, kiko ta e diferensia pa kambia. Durante e implementashon nobo, Eunice a siña ku ora bo inkluí e empleado den e proseso, nan ta mas habrí pa e kambio i ta komprendé e efekto positivo. Eunice ta yama esaki “The level of adoption”, ku ta referí na e nivel di kon lihé un organisashon ta implementá i aseptá e kambio teknológiko i digital.

E ruman chikí: Lucidity Society

Lucidity Society ta un konsepto nobo saká for di Lucidity. E ruman grandi semper a enfoká riba negoshi pa negoshi, i e ruman chikí lo enfoká mas riba e persona mes, kon bo ta sinti i kon teknologia por yuda bo bida personal. Bida a bira karu, pero tin hopi oportunidat pa negoshi i pa desaroyá bo mes. Lucidity Society ta yuda bo wak kiko bo ke logra i kon bo por kombiná bo situashon aktual ku bo meta i bo ambishon. Lucidity Society ta pone enfoke riba e parti femenino di un persona: komprendé bo emoshonnan, bo bienestar i bo konfrontashon ku teknologia. Lucidity, e parti maskulino, ta mas basá riba strategia i negoshi. Eunice ta bisa ku e konsepto di Lucidity Society ta pa yuda hende buska nan pashon, i yuda bo krea espasio den bo mente. Esaki tambe por impaktá bo finansa personal, pa hasi e akshon ku ta trese bo, por ehèmpel, un oumentashon di 5000 èkstra den bo salario.

Próksimo 5 añanan

“Mi ta sigui mi energia i bai den e direkshon ku e ta manda mi,” Eunice ta bisa ku un sonrisa di determinashon. Den e próksimo 5 añanan, e ta mira Lucidity i su ruman chikí Lucidity Society krese na un nivel internashonal. E vishon ta pa kreá un komunidat global kaminda teknologia i bienestar humano ta bai man ku man. No solamente pa yuda negoshinan krese, pero pa yuda hende biba un bida mas konsiente, usando e ekiponan teknológiko pero ku balansa.

Lucidity Society lo no ta solamente tokante teknologia; e lo ta tokante kon bo ta biba bo bida, kon bo ta usa e ekiponan teknológiko pa sostené bo bienestar, bo meta i bo kresementu personal. E meta final ta pa krea un komunidat di hende ku ta inspirá otro pa hasi un kambio positivo den nan mes bida i den mundu digital di mañan. Den su kabes, e tin gana di skibi un buki den e 10 añanan ku ta bin, i ku e meta pa traha ku mas kompania internashonal i organisashonnan. Resientemente, el a hasi ku un ‘podcast’ ku Sur-Afrika, un eksperensia ku a yuda ku su meta pa yega internashonal.

Por tuma kontakto dirèkt ku Eunice Cijntje na 520-2134, òf ‘e-mail’: hello@eunicecijntje.com, tambe via LinkedIn, kaminda e ta hopi aktivo pa informá, eduká i krea oportunidat pa kolaborashon.

Eunice ta klousurá ku digitalisashon i outomatisashon ta kana man den man, i no ta algu ku bo por buta tras di porta.