BOGOTA, AP.- E proseso di pas entre e gueria kolombiano mas importante i gobièrnu a bolbe kompliká despues ku FARC a entregá un inventario ku su bienes i esaki a wòrdu kuestioná pa gobièrnu e siman aki. Eks lidernan rebelde a sostené djabièrnè ku e aktivonan reportá tin un balor di 326 mion dòler, e kantidat ku ta korespondé ku loke ta registrá,
E kuestionamentu di outoridat a surgi paso e inventario a inkluí algun kos sin ningun balor komersial. Segun e akuerdo di pas firmá den novèmber último entre ámbos parto, e aktivonan mester sirbi pa e víktimanan di e konflikto.
Komo konsekuensia, e fiskal general di Colombia i otro outoridat a eksigí pa e grupo aklará kuantu plaka i propiedat esaki tin promé ku kontinuá ku e transishon pa kombertí e grupo gueria den un movementu polítiko.
Segun eks lidernan di e gueria, e kuestionamentunan di Nestor Martinez, fiskal general kolombiano, a forma parti di un intento di distraé e sosiedat di kasonan ku ta involukrá funshonarionan di gobièrnu di korupshon i esaki lo tarda ku e lansamentu ofisial di e grupo polítiko.
Presidente Juan Manuel Santos i FARC a firmá un akuerdo históriko di pas pa pone fin na mas di sinku dékada di konflikto ku a laga por lo ménos 250.000 morto, 60.000 persona pèrdí i mas di shete mion persona desplasá.
