PANCHKULA, INDIA, AP.- Disturbionan na nort di India a provoká 28 morto, mas di 250 herido i vários kandela despues ku korte a deklará e lider di un sekta religioso kulpabel di violá dos di su disípulonan, segun indikashon di outoridat.
Polis a purba di usa awa pa plama e multitut. Mas di 15.000 efektivo paramilitar i di polis, algun riba kabai a okupá e kayanan di pueblo di Panchkula, den estado di Haryana.
E manifestantenan a sende edifisio di gobièrnu na kandela, na a ataká polisnan i periodistanan di televishon. Ademas nan a destrosá bentana di un trùk di medionan i un ekipo di transmishon.
“E situashon ta tenso. Tabatin kandelanan provoká i a kima instalashonnan”, segun indikashon di Rajiv Mehrishi, minister di Interior.
E violensia a laga por lo ménos 28 morto, di kual algun a muri tirá i mas di 250 herido, segun B.S. Sandhu, un funshonario haltu di polis di Haryana.
Sandhu a bisa ku mas di 1.000 siguidó di e Guru a wòrdu detené na Panchkula pa kargonan di kandela provoká i destrukshon di propiedatnan públiko.
E Guru, kende a deklará inosente di violashon di dos muhé den su ashram na 2002, a wòrdu enkarselá den Rohtak. E oudiensia di e sentensia ta bai tuma lugá pa 28 di ougùstùs, segun indikashon di fiskal H.P.S. Verma.
