Tittel del Mar; riba pantaya na International Film Festival Rotterdam

Kòrsou lo tin un dokumental tokante di ‘motorsport’, ku lo bai marka historia i krea un imágen nobo pa Kòrsou. Tittel del Mar, un artista i sineasta, despues di un preparashon di dos aña, lo bai presentá su dokumental, Horsepower. Un dokumental ku lo keda presentá próksimamente na festival di ‘film’ na Ulanda International Film Festival Rotterdam. Tittel a skibi i dirigí e produkshon. Ora bo tende e título Horsepower, promé kos ku ta bini na bo mente ta velosidat, adrenalina i kosnan brutu. I spesialmente pa esaki, e programa di djasabra a invitá Tittel pa trese nos mas serka di e mundu di Horsepower, pashon i kultura di ‘motorsport’ riba nos isla.

Ken ta Tittel del Mar
Tittel a bishitá e dushi skol Maria Immaculata Lyceum (MIL), i ta un ‘’proud Miliano. Despues di kaba su estudio na MIL, el a sigui ku su estudio preparatorio di arte. Ora el a finalisá esaki, el a bai Willem de Kooning Academy na Ulanda. Den e temporada ei Tittel a pasa pa un periodo difísil i lamentablemente e no por a kaba su estudio. El a regresá Kòrsou, i  for di e dia ei el a kuminsá apliká su konosementu pa yuda nos hóbennan. Ademas, el a habri su propio kompania i a kuminsá traha di manera independiente.

Skibi, saka potrèt i traha video

Na 2014, a habri e UNESCO Media Development Program, kaminda Tittel tabata un di e personanan ku a risibí e Young Talent Sponsorship, un trayekto kaminda el a spesialisá den periodismo. Asina el a kombiná su talento di storytelling ku su abilidat artístiko ku e tabatin kaba: skibi, saka potrèt i traha video. For di chikitu, Tittel semper tabata poeta del alma, e tabata skibi historianan kòrtiku i saka potrèt for di 5 aña. E hendenan rondó di dje no tabata gusta mes, pasó Tittel ta bisa ku e no gusta ora hende para pa saka potrèt. E ke saka hende den akshon, den nan propio mundu, natural.

Algu no tabata klòp

For di su pashon el a krea inisiativanan manera Otrobanda Reporter i We Are Curaçao. Banda di esaki el a duna lès pa mas ku 10 aña. Pero esaki no tabata komplasé Tittel mas. Durante e periodo di COVID, Tittel a kuminsá kuestioná su mes: “Algu no ta klòp.” E tabata sinti strès, despues el a haña un burnout. Den seshonnan ku sikólogo, e profeshonal a puntra: “Si bo kuminsá kompletamente di nobo, sin trabou, sin kas, sin nada, kiko lo bo ta hasi?” Tittel a kontestá sin duda: “Mi lo traha arte tur dia”. E no a menshoná su studiantenan, apesar ku su studiantenan tabata tur kos p’é.

Arte mas i mas den bida diario

Asina Tittel a kuminsá hinka arte mas i mas den su bida diario. El a kuminsá traha kuadro, i na 2023 el a hasi su promé presensia riba esenario. Einan el a komprendé ku tur loke el a traha den e añanan anterior tabata nesesario, e tabata un preparashon pa e kuentanan ku e lo bai konta awor i pa futuro. Un persona ku ta traha na radio a bisa e: “Tittel, loke bo a hasi, ta planta un simia,” un frase ku ta deskribí perfektamente loke Tittel ta hasi na e momentu aki kuné. Esaki ta solamente e komienso. Por spera hopi mas na kaminda.

Horse Power: e dokumental ku lo bai marka historia

Tittel ta konta ku tur kos a kuminsá 10 aña pasá, ora el a kuminsá dokumentá ‘motorsport’ na Kòrsou. Tur hende tabata puntr’é di Alexander Hanst, dikon el a skohe Alex. Pero loke hopi hende no sa, ta ku Alex tabata un di e promé personanan ku a duna Tittel pèrmit pa por saka su potrèt. Tittel ta sigui bisa ku e tempu ei tabata 2012/2013, i hende muhé ku kámara no tabata mashá komun. “Ora bo yega pista i pidi pa saka potrèt, nan ta keda wak bo di ariba bai abou i puntra: ‘Kiko e mucha muhé aki a bin hasi?’” Tittel ta konta. Un dia, despues ku el a mustra Alex algun di su trabounan, Alex a bis’é bon. El a invitá Tittel i a bisa: “Bin Koraal Tabak djasabra awor, laga mi mira kiko bo por hasi.” Alex a gusta e potrètnan asina hopi, i te dia di awe Tittel a keda tin kontakto kuné.

Proyekto espektakular

Asina tur kos a kuminsá kana. Tittel a kuminsá bai pista regularmente, i e tempu ei no tabatin ni un evento ku Tittel no tabat’ei presente. For di e promé pasonan ei, 10 aña pasá, te ku awor, su relashon ku e mundu di ‘motorsport’ a bira un pashon, konfiansa i kuenta visual, un trayekto ku a pone e fundeshi pa loke awor nos ta konosé komo Horsepower. E ta sigui konta ku durante temporada di COVID, Tittel a bin mira su mes i pensa: “Bo tin añanan ta saka potrèt, ta dokumentá riba Instagram i Facebook. Pero esaki ta hasi algu ku bo: bo ta bira mas grandi, bo ta sinti un urgensia pa splika kosnan ku bo ta mira riba pista, kosnan ku hopi hende no sa di dje.” Hende ta kere ku ‘motorsport’ ta djis zonido, bochincha i hasimentu di bruá, pero segun Tittel, e realidat ta mas profundo. “Tin un komunidat einan. I ora bo kuminsá dal aden, bo ta bisa: ‘hepa, esaki ta grandi.’” Na 2022, Tittel a disidí ku e mester traha un dokumental. El a apliká na Alex Alberto’s fonds i el a risibí sosten. E ora ei nan a motivá Tittel pa apliká tambe na e Holland Film Lab durante e Nederlands Film Festival. I di un dia pa otro, el a risibí un mensahe: “Bo proyekto ta espektakular. Bin. Tur kos ta reglá.”

Un porta a habri otro

Promé ku e por a realisá, Tittel tabata forma parti di un ‘lab’ na Ulanda, yen di charla, preparashon i reunion ku hende di e industria di sinematografia. E ta konta ku su promé proyekto no a funshoná ku su promé produktor, pasó su produktor a tuma un reto mas grandi. Pero esaki a habri un otro porta i asina el a topa e produktor ku finalmente a traha Horsepower. Un dia, sintá huntu ku e produktor i dos otro persona mas, e pregunta a bin: “Konta mi mas di bo proyekto. E ta mustra interesante.” Un par di luna despues, e produktor a yama Tittel pa bisa e, ku el a drenta un Producer Academy i ku e mester di un proyekto pa traha un ‘short film’ (pelíkula kòrtiku). Tittel a puntra: “Kon nos lo hasi esaki?” E produktor a kontestá: “Mi ta kere bo mester skohe un hende.” I mesora, Tittel a pensa riba Alex. “Si bo a bisa mi skohe dos hende, mi lo mester a pensa mas profundo. Pero si ta un so, mi tabata sa mesora mesora. No tin un otro hende ku mi por pensa riba dje, ku no ta Alex.”

Dikon Alex

Hopi hende ta puntra dikon Tittel a skohe Alex. Tittel a bisa ku e konosé Alex 8 pa 10 aña kaba. Durante e añanan aki niun bia Alex a papia ku arogansia si no ku formalidat, i semper su mes. I esaki ta loke a kapta Tittel su atenshon. “Mi no mester di un hende ku ta bai sinta dilanti di kámara hunga ‘big man,’” Tittel ta bisa. “Mi mester di un hende ku mi por kòmbersá kuné, algu natural, algu real.” E konfiansa i e manera humano di Alex a krea un base fuerte pa e historia ku nan ta bai konta huntu.

Historia di velosidat

Tittel ta sigui bisa: “imaginá bo ta sintá i bo produktor ta puntra bo pa bèl e, pas e tin un kos importante pa konta bo. E ta bisa bo, “IFFR ke bo pelíkula.” Un orguyo ku te dia di awe Tittel ta sinti. “Mi a bisa: ‘Mi no tabata sa ku bo a entreg’é kaba. E proseso no ta asina leu ainda.” “Nan a wak e film durante un screening i e reakshon a bin mesora: “We want this,” e produktor a bisa. Pa Tittel, e momento ei tabata siguiente nivel. “Bo a traha un kos asina bunita, ku hende ku no ni konosé bo kultura por sinti e, por apresi’é, i por bisa: ‘We need that.’” I asina, Horse Power no a bira djis un dokumental di ‘motorsport’, pero un brùg entre Kòrsou i e mundu, un historia di velosidat, komunidat i alma, kontá for di pista pero ku bo por sinti te den kurason.

Loke por spera di Horsepower

Tittel ta bisa ku e gusta e pregunta akí, pasó el a kuminsá risibié kaba riba medionan sosial: “bo ta bai papia di geluidoverlast tambe?” Loke e ta gusta di Horse Power ta ku e pelíkula aki ta mustra bo un hòmber pará den su sapatu, on i off screen. Lo bo mira Alex ta hasi kenshi, huntu ku su brònan, den entrenamentu na Hato, tur e bochincha, tur e huma, tur kos. Pero tambe lo bo mir’é sintá kantu di laman, ta splika kon e ta plania su proseso, kon e ta hinka su skema den su kabes, kiko e ke realmente den bida. Lo bo mira su tata papia di e aksidente ku el a pasa aden, un momento ku a marka nan famia. Lo bo mira su tambe su amigu, ta bisa ku el a mira e gai akí den un estado di “total loss.” Asina, tiki tiki, bo ta haña sa kos di Alex ku bo no por a imaginá promé: ken e ta realmente, kon humilde i humano e ta. Segun Tittel, miéntras Alex tabata papia, e kamarero ta puntra e: “are you okay?” I Tittel tabata djis skucha, ketu, laga e momentu pasa. Tabatin bia ku e mester a keda na banda i laga Alex hasi su kos. Ta un historia hopi bunita pa sa mas tokante di dje. Esaki ta djis un ñapa, un pida chikí di loke Horsepower lo bai demostrá.

Meta di e produkshon di Horse Power

Tittel ta bisa ku pa e tabata hopi importante pa ilustrá ‘motorsport’ na Kòrsou for di un otro ángulo, un otro bachi. Nos por papia di e zonido, e huma, e peliger, pero na final di dia nos ta papia di un hòmber atleta, un deportista ku ta rekonosé internashonalmente den e Bike Life Hall of Fame. Tittel ta kuestioná: “dikon ora e ta un deportista di beisbòl òf futbòl nos ta halsa nan nòmber, nos ta pone nan riba pedestal, pero ora nos ta papia di ‘motorsport’, nos ta lag’e pasa?” Nos ta papia di un hende ku tin mas di 140 mil siguidó, ku su videonan ta yega na mas ku un mion di hende riba diferente plataforma. Ta un persona rekonosé den e mundu aki. “Dikon e no ta haña e mesun tipo di aplouso, e mesun tipo di rekonosementu?” Alex tin Kòrsou na su man, i unda ku e bai, e ta laga tur hende sa ku e ta di Kòrsou. Su identidat ta kana huntu kuné, na kada pista, na kada show, na kada esenario. Tittel ta bolbe puntra: “dikon nos no ta halsa e manera nos ta hasi ku tur otro deportista?” Bo por laga di gusta su deporte, òf su estilo, pero esaki no ta kita for di e echo ku e ta sali, e ta mustra, i e ta bende Kòrsou tur bia ku e haña un chèns. Ta un mensahe di orguyo, di visibilidat, i di rekonosementu pa un deportista ku ta pone su isla riba mapa mundial.

Kòrsou su mal impreshon di ‘motorsport’
Tittel ta bisa ku un di e motibunan ku e mes a kuminsá e investigashon tabata pa komprendé e mundu di ‘motorsport’ mas mihó. Pasó ta un kos pa wak e parti legal, e reglanan i e restrikshonnan for di pafó. Pero ta un otro kos ora bo ta para na Saliña, bo ta mira e otro banda, e mesun gainan ku ta bisti pak te na garganta, i bo ta puntra bo mes: “kon e mundu akí ta funshoná realmente?” Ora bo ta papia ku nan, nan ta splika bo, nan ta duna bo konteksto. Por ehèmpel, e motibu dikon nan ta kore sin hèlm den sierto momento. Tittel ta konta ku Alex lo tabata morto awe si e tabatin su hèlm, pasó el a pega bou di un outo, i e hèlm lo a kibra den su kabes. Nos ku ta pará pafó, hopi bia nos no ta komprendé tur e kosnan. Nos ta wak e imágen, e zonido, i e akshon. Pero esnan ku ta biba e deporte, ku tin e eksperensia den nan kurpa i nan kabes, sí ta komprendé tur e rísikonan, tur e eskoho, i tur e konsekuensianan ku ta bini huntu ku e deporte.

E proseso pa yega na Horse Power…

E no tabata fásil. Tittel ta bisa ku el a yora. “Ta un kos ora bo ta un filmmaker, i ta un otro kos ora bo ta un artista ku ta traha pelíkula,” e ta splika. Ora bo ta filmmaker, tin un bos di herarkia: ken ta hasi kiko, ken ta manda, ken ta sigui. Tittel ta bin di un background di arte kaminda e mes ta filma, e mes ta editá, e mes ta produsí, manera nan sa bisa un one man show. Ora kosnan ta kana bruá, e tabata kustumbrá pasó e mes lo tin ku resolvé nan. Pero e bia aki tabata diferente, nan tabata bisa “warda, warda, abo ta direktor.” Tittel tin mas ku 15 aña di eksperensia, ke men e sa kiko traha un pelíkula ta kome i bebe di dje. Pero ora bo ta traha algu grandi, algu bunita manera esaki, bo mester di un tim. E ta konta ku e ta un tiki spesial den su manera di komuniká, i no tur hende ta komprendé esaki na promé instante. Tin bia hende ta bisa algu, i e ta tuma e kos muchu na kurason, pero meimei di e komunikashon e sa pèrdè pida di e mensahe, i e ora ei kos por brua. E proyekto akí tabata un proseso kaminda Tittel a siña hopi, tantu personal komo profeshonal. Den e trayekto, el a deskubrí kiko e ke logra di bèrdat den su karera artístiko. Esaki no ta promé ni lo no ta e delaster. Tittel a pasa den tur tipo di produkshon, for di grabashon te skibi script, for di traha ku hende individual te organisashonnan grandi, tur kos, asta su propio kompania di krea kontenido. Pero esaki tabata su promé dokumental, i ku orguyo e ta bati riba su pechu i bisa: “esaki ta di mi, e konsepto akí ta di mi.”

E dokumental ta dura 21 minüt, ku un preparashon di dos aña, mas ku 10 ora di grabashon. For di tur e materialnan ei, mester a skohe, kòrta i finalisá e proyekto. Tittel ta bisa ku e ta masha kontentu ku su editor. “Un mucha muhé ulandés/surinameño,” Tittel ta bisa, “ku ta mira bo i ta bisa: ‘splika mi kiko bo ke.” Bo ta splik’é, i e ta kontestá bo: “mi ta laga bo sa awe tardi.” Mainta e tabata sintá den kantor, i atardi e tabata manda un muestra. E tabatin un konekshon ku e historia, maske e mes no tabatin nada di aber ku ‘motorsport’. Tittel ta bisa chistoso ku e ta kere ku, ora bo ta un tiki di “aki banda den Karibe,” bo tin un sous ku ta sali natural.

E ta sigui bisa ku e pelíkula no ta ‘edit’ manera un pelíkula di akshon, i tampoko manera hopi dokumental. E editashon ta mas romántiko, mas profundo, ku un zonido “kompletu” manera Tittel ta bisa, ku ta karga e historia den su totalidat.

International Film Festival
E festival ta tuma lugá for di dia 29 di yanüari te 8 di febrüari. E apertura ofisial, i e estreno mundial ta dia 30 di yanüari. Tittel mes no a mira e vershon final di e pelíkula ainda, loke ta hasi e momentu aún mas spesial ainda. Dia promé di febrüari tin e dos screenings, kaminda e pelíkula lo hunga pa di dos bia.

Si bo ta na Ulanda i bo ke partisipá, bo por subi riba e página di IFFR i buska bo karchi. Tittel ta bisa ku si di kurason bo ke bai, pero bo no a logra keda kla ku bo entrada, e ta invitá bo pa tuma kontakto kuné via Instagram: Tittel del Mar. Manera e ta bisa, “pa mi hendenan, mi lo hasi tur kos.” E meta ta pa yena e sala ei i laga tur hende sa ku Kòrsou ta representá, i Kòrsou t’ei.

Lo tin un Q&A na final kaminda bo por konosé Alex for di bo mes perspektiva. Tittel a primintí Alex: “despues di esaki,  mundu lo sa ken bo ta. No lo ta solamente hende di ‘motorsport’.”

Despues di e festival na Ulanda, e dokumental lo bin Kòrsou. I Tittel ta sigur ku e sala na Kòrsou lo ta yen yen.

Plannan pa ku futuro
Tittel ta terminá bisando ku e lo bai tin un proyekto ku lo bai mas den profundidat di ‘motorsport’ na Kòrsou, ku lo bai analisá e dinámika i e nesesidat di bochincha. Loke semper ta bin dilanti for di tur investigashon ta ku nos ta den búskeda di libertat. Alex tabata e komienso: e promé kapítulo. Lo bai tin un kontinuashon, no solamente di e kosnan bunita, pero un análisis di e komunidat den su totalidat, ku lus i sombra, ku orguyo i ku reto.

E soño ta keda òf mihó bisa, segun e ambishon di Tittel, ta pa krea un serie ku ta papia di e lastramentu di tayer. For di baiskel te ku kareda di garoshi, for di pista na Ronde Klip te na tur Rinkon kaminda motor a laga su marka, un parti di e historia akí ta serka, un parti ta leu. I tiki tiki, nos ta yega na e punto kaminda Kòrsou por mira riba su mes i bisa, nos tin 100 aña di ‘motorsport’.

E deseo ta pa e pueblo por yega unda ku ta, i haña e informashon akí, no solamente pa mira, pero pa komprendé. ‘Motorsport’ ta un deporte, un kultura, un mundu ku tin hopi desaroyo mas pa bin ainda. E medaya no tin dos banda so; e tin e rant tambe. I den tur loke Tittel ta traha, tin solamente un meta: “hasi esaki pa su pais”.