WILLEMSTAD.- Pronóstiko di tempu pa Kòrsou i bisindario bálido te djamars atardi 6’or, ta indiká ku durante e siguiente dianan wer lo keda seku, kalor i stòf di Sahara lo persistí.
Manera menshoná, tempu por lo general lo ta parsialmente nublá i no ta antisipá áwaseru signifikante. Pa motibu di stòf di Sahara bista lo ta un poko redusí.
Temperatura máksimo lo alkansá 32ºC i temperatura mínimo 28ºC.
Bientu lo supla generalmente ost i moderá ku forsa 3 te 4 (12 te 30 km/ora, 7 te 16 nudo). Durante di dia, de bes en kuando ráfaga basta fuerte ku forsa 5 (31 te 39 km/ora, 17 te 21 nudo).
Pa loke ta trata situashon general, t’asina ku durante di próksimo 24 ora, kondishon atmosfériko ta limitá desaroyo di nubianan signifikante riba nos region i pa e motibu aki, un wer prinsipalmente seku lo prevalesé riba nos isla.
Sinembargo, un oumento temporal di nubia na nivelnan mas abou di atmósfera por kondusí na algu di áwaseru riba sierto parti di nos isla durante oranan di mainta. Mas aleu, presensia di stòf di Sahara lo redusí visibilidat den nos área.
Kondishon di laman lo ta trankil te moderá ku altura di ola entre 0.5 i 1.5 meter (2 i 5 pia).
E perspektiva te djárason atardi, ta por lo general parsialmente nublá i prinsipalmente seku.
