Katherine Filesia
Den bida no tin di warda te ora malesa presentá pa kore regla tur asuntu manera traha tèstamènt. Tèstamènt no ta nifiká ku bo ta bai muri, pero e ta sòru pa kita tur posibel doló di kabes ku por presentá despues di morto. Katherine Filesia ta Kandidaat Notaris na Hulanda, kende resientemente a promové den Trust. E tin konosementu amplio di tèstamènt i el a duna nos di Djasabra un splikashon di kuantu tipo di tèstamènt tin i kiko tur por hasi pa regla nos asuntunan.
Dikon tèstamènt ta asina importante
Katherine a bisa ku tèstamènt ta hopi importante pasobra loke por mira na Kòrsou ta ku tin hopi herensia ku no a keda partí. I hopi hende na Kòrsou no a traha un tèstamènt. Dikon ta importante pa taha un tèstamènt, Katherine a bisa ku ei den por skibi presis pa ken ta laga bienes. I tambe e propiedatnan ku ta keda atras no ta keda sin un doño pasobra esei ta sosodé hopi bia pasobra e hende no a traha tèstamènt i esei mester kambia. Laga bo bienesnan pa un persona i si ke hasi esaki ta bon pa regl’é den un tèstamènt.
Codicil tèstamènt
El a mustra ku tin diferente tipo di tèstamènt, tur kos ta dependé di e deseonan di e kliente, kiko nan ke pa regla den e tèstamènt i kiko tin di pone den dje. Un ehèmpel ta e tèstamènt Codicil; einan bo no tin di bai notario pa trahe pero tin di tene kuenta si ku no tur kos por skibi den dje. Lei ta stipulá kiko por hinka den un Codicil. Por ehèmpel si bo tin sierto prenda i buki, por hinka den dje. Si ke laga kas atras e ora ei si mester bai notario pa yuda traha e tèstamènt. E Codicil e persona mes por pone riba papel. E ta djis skibi esaki riba papel i ora skibié sòru pa skibi e fecha i firm’é. I si hasié, e tambe ta konta sin mester di apostiye, E úniko kos ta, ku esun ku traha un Codicil, mester laga otro sa ku e ta eksistí i lag’é pa e herederonan hañ’é despues, sino e ta bira difísil pa sa kiko e deseo tabata. Lei ta bisa kiko por pone den un Codicil i esei ta prenda, buki, sierto muebel di kas. Si ke pasa un kas si pa un yu òf outo e ora ei si ta nesesario bai un notario.
Depot tèstamènt
Banda di e Codicil tin tambe e Depot Tèstamènt, ku tampoko ta nesesario bai notario pa esaki. Segun Katherine un ehèmpel di esaki ta prens Bernhard na Hulanda tabatin un Depot Tèstamènt. El a skibi tur loke e ke den dje. E úniko kos ku por hasi ta laga notario ward’e i ora bo fayesé ta habri e tèstamènt. E Depot Tèstamènt tambe por konta den kaso di emergensia, òf si bo ta riba barku òf den un guera. Einan no mester bai notario i no tin di tene kuenta ku e formalidatnan. Eseinan segun Katherine, ta e formanan di tèstamènt eksepshonal. Kontrali na e Codicil, den e Depot Tèstamènt si por pone pa ken bo kas ta keda. E úniko kos segun Katherine ta ku si e persona no ta un hurista, e mester wak pa e ta bon traha pa e ta konta ora e persona muri. Hopi bia esun ku traha un Depot Tèstamènt ta wòrdu konsehá kon pa hasi esaki. Kisas e persona ku traha e Depot Tèstamènt ke bai un notario, pero den e kaso aki e notario no ta firma e akta. I ora e hende muri, e notario ta habri e karta/depot tèstamènt.
Den tèstamènt ta pone deseo
E otro tèstamènt segun Katherine ta esun ku nos konosé komo e tèstamènt. Ei den bo ta pone bo deseonan. Bo ta bai notario i e ta duna konseho. E hende tin di splika kiko e ke i notario ta trasladá esei den e akta. Despues ora notario kaba, e hende ta haña e konsepto pa e lesa pa mira si e ta komprondé i ora tur kos ta bon kla, e notario ta les’é pa e hende i asina e ta keda firmá pa notario.
Nada ku papia ta sali pafó
Un pregunta ta si mi tin di bai ku mi yunan ora di traha tèstamènt pa nan sa. Segun Katherine, den práktika nan a mira ku hende ta bai ku yu or asta subrina ora di traha tèstamènt. Pero notario semper ta wak realmente e hende ku ta bai laga traha su tèstamènt, si esei ta su deseo i ta pone riba papel. Tèstamènt ta algu personal i ta e deseonan di e hende so ta bai ei den. Kisas si e hende bai tòg ku un yu i e ke pa e yu bai paden kuné ora di firma e tèstamènt pero si e notario tin duda ku si ta esei e kliente tabata ke, por tene e yu pafó. Ta papia ku e kliente i wak si realmente e tabata ke pasobra tin bia tin preshon ta wòrdu poné. Notario tin deber pa mira si realmente e hende ke loke el a splika i si ta esei e ke i ademas e notario tin e obligashon di sekresia. Tur loke papia ku e notario tin di keda ei den no mag di bai pafó. Meskos e persona por asta pidi e notario pa warda kopia di e tèstamènt pe, ya ku kisas el a laga su bienes pa un yu so. Notario ta un trabou di hopi responsabilidat i mester wak semper loke e kliente ke. E kliente ta konta loke e ke i e notario ta traslad’é hurídikamente. Ta pone loke e hende ke mas mihó posibel.
Desheredá un yu
Hopi a kambia pa loke ta tèstamènt. Si ántes e tabata djis algun blachi, awor un tèstamènt ta manera un buki. Katherine a bisa lei ta kambia, na 2012 tabata e último kambia i ta un kambio hopi grandi. Un ehèmpel ta e Legitieme Portie ku ántes tabata konosí bou di Kindsdeel, si un mayor ke desheredá un yu, lei ta bisa ku no por hasié kompleto pero ta haña mitar di loke e mester a haña. Na Kòrsou tabata dependé kuantu yu bo tin pero for di 2012 el a keda abolí. Si awor un mayor ke desheredá un yu, esei ta posibel. I no tin di informá e yu ku desheredá nada. Loke esun ku ta traha e tèstamènt, e mester sa kiko e ke. Awendia hende ta biba largu i tur hende mester sòru pa su mes i p’esei e kambionan den lei for di 2012.
Por nenga pa traha tèstamènt
Otro punto importante ku Katherine a menshoná ta pa wak si e hende ku ta bai laga traha su tèstamènt ta apto pa hasi esaki. Den trabou di notario, semper nan ta wak si e ta bon bei pa mira loke e ta bai skibi den tèstamènt ta loke e ke, si e ta komprondé e konsekuensianan di e tèstamènt. Komo Notario mester chèk esaki pasobra no ta solamente demensia ta konta, pero e hende por tin un problema mental tambe. Voral serka hende grandi ta pidi un deklarashon di dòkter independiente pa mustra si e hende ta bon. Ta diferensia di notario ki edat ta pidi esei, pero den mayoria kaso ta hasi si e hende tin 75 aña bai ariba. I den kaso si e persona tin problema metal por nenga di traha e tèstamènt pe. Esaki pasobra e hende ei no sa e konsekuensianan di un tèstamènt. I si resultá ku e hende muri i e no tabata bon, ta e notario ta esun responsabel.
Leven Tèstamènt
Otro tipo di tèstamènt ku Katherine a papia di dje ta e Leven Tèstamènt. E no ta hopi konosí na Kòrsou pero ounke e nòmber ta papia di Leven Tèstamènt, e mester wòrdu trahá na bida. Un Leven Tèstamènt ta un Notariele Volmacht i na bida bo ta trahe i us’é na bida. Por ehèmpel si un hende no ta bon mas na mente i no por atendé ku su bienestar, ta traha un Leven tèstamènt i esun ku no ta bon na mente ta sòru pa su kosnan por sigui kana. Por ehèmpel si mester regla algu na banko òf si hende mester hasi ‘aangifte’ di belasting òf bende kas. Tur eseinan por pone den un Leven Testament. Asta di e hende bai den koma, e por bisa pa su yu ta su apoderado pa regla su kosnan di banko, pa sigui paga debenan. Por atendé ku belasting, e por bai notario pa regla i bende kas i pa eseinan un Leven Tèstamènt. E ta masha interesante tambe pasobra ta mira hende ta warda te ora e hende ta demensia òf den koma i tin di bai wes i ta un proseso masha largu i kostoso. I si tin un Leven tèstamènt e ta sali mas kumbiniente i mas barata pa tur kos por sigui kana i diferente instansia ta tum’é. E hende por skibi spesífikamente kiko e ke. Katherine tabatin un kliente ku a skibi pa su kosnan di banko wòrdu reglá i asta si e tin di bai den kas di hende grandi kon e kos tin di sosodé i asta pa tur djabièrnè e bebe un glas di biña i pone lipgloss pe. Esei ta pa mustra ku por ta spesífiko den e Leven Tèstamènt. Bo por skibi bo deseonan mas amplio den Levens Tèstamènt. Ta dependé ki ora e tèstamènt ei ta konta. E por konta mesora, òf por skibi den e tèstamènt ku ora tin deklarashon di dòkter ku konstatá no ta bon na mente e ora ei e ta konta. Tin dos parti di e Levens tèstamènt ta pa ora tin di regla kosnan di bo bienes i asta si algu pasa esun apoderá, por skohe otro hende. E di dos parti ta esun médiko kaminda por skibi ku si e kai den koma ken ta trèk e stèker òf si ke eutanasia. Maske e parti médiko mester papi’é hopi bon ku dòkter di kas. I na momentu ku e hende fayesé e Levens Tèstamènt ta kaduká i e ora ei ta e tèstamènt normal ta konta.
Konsekuensia di no tin tèstamènt
I kiko ta e konsekuensianan ora no tin niun tipo di tèstamènt. Riba e punto aki Katherine a bisa ku si no tin nada reglá, mayoria bia ora e hende fayesé e promé kos ku notario ta wak e deklarashon di “erfrecht” kaminda e notario ta pone ken ta heredero i kiko i kon a aseptá e herensia. I promé tin di wak si tin tèstamènt i si e no tin e, ta dependé kon e famia ta ta wak e repartishon legal. Ku esaki ta wak si tin un kasá a keda atras i si tin mínimo un yu i no tin nada mas, lei ta bisa e kasa ku a keda atras ta haña tur kos i e yunan ta haña un ‘claim’ riba e esposo ku a keda atras. I ta ora e muri e ora ei nan por ‘claim’ nan parti. A bin ku e kos ei pasobra e kasá kisas a sòru semper pa su kasá i pa e no sufri di hamber, lei a bin ku e stipulashon ei. Pero tambe ta mira den práktika ku esun ku a muri i esun ku a keda atras tin un yu pero tin mas yu pafó di matrimonio. E ora ei ta wak a base di lei ken ta e heredero. Si ta kasá i yunan i no tin kasá ni yunan ta sigui wak abou na mayornan, rumannan. Pero si yega na e ‘6de graad’, e ta bai pa estado. Pero tambe tin di wak si e heredero ta aseptá e herensia òf no. E kaminda ta hopi largu si no tin tèstamènt. Por mira esei awor ku yen herensia k no a wòrdu parti. Tin herensia di 40 aña pasa ku hende a kasa, divorsiá, muri i awor despues di 30 aña tin di repartí i tin di kontakto bòshi hende. Esei ta e situashon ku notarionan ta topa kuné. E ta dura hopi pa parti herensia pasobra ta dependé di hopi kos manera ‘stamboom’, i tin bia esaki ta kompliká. Por haña elemento internashonal na otro pais ku ta hasi e situashon difísil. Tin hende ta kere ku ta sin mas e ta bai pero ta hopi investigashon e notario tin di hasi. No lubidá ku e notario ta esun responsabel i nada por bai robes.
No ta asina asina ta ehekutá tèstamènt
Ku esaki mester tene kuenta ku no ta sin mas ora tin tèstamènt e kos ta kana den dos dia. Ora wak e proseso di traha tèstamènt, e kliente ta bai e notario i splika loke e ke, notario ta hasi su investigashon pa wak kon ta interpretá lei, wak sentensianan di wes pa no skibi nada robes etc., etc. I ora tur kos ta bon, ta manda e tèstamènt pa e kliente i si tin pregunta ta bolbe kambia i ora tur kos ta bon ta firma. Ta un proseso basta largu i ora di ehekutá tambe e ta largu. Tin hende ke pa ehekutá e tèstamènt mesora pero e notario ta responsabel i mester hasi hopi investigashon.
