Stephanie Hasham; The Krioyo Chic Collection; tasnan úniko
….Stephanie Hasham, yu di Kòrsou ta markando su nòmber i di Kòrsou na Merka, ku su marcha NO/R. Un diseñadó di moda, un artista ku produktonan impreshonante. Stephanie ta biba na Merka/Atlanta i el a konsedé nos di Djasabra un entrevista eksklusivo. El a nase na Kòrsou i desaroyá su mes na nos isla. Ora el a disidí di bai skol el a haña oportunidat di bai skol na New York den Fashion and Fine Arte na Merka New York. Semper e tabata interesá den arte; for di chikí. Bayendo bèk den su potrètnan bieu na Kòrsou, e ta kòrda un rapòrt di kleuterklas kaminda yùfrou a skibi ku, esaki si lo ta bai ta un artista. Esaki ta mustra su kuriosidat ku a yud’é desaroyá. El a gosa tambe ku sosten di su mayornan pa e hasi arte su profeshon. Stephanie na 2007 a bai Merka esta kasi 16 aña na Merka kaminda e ta residensiá te awe.
Konsentrá den kueru
E kier a hasi promé diseño di muebel pero a hasi Fine Arte ku ta tur tipo di arte, ounke su kurason ta den eskultura. E ta traha praktikamente ku tur sorto di material i awor e ta konsentrá ku kueru. I ku esaki el a lansa su marka di No/R esta No Rehearsel.
Amor pa moda
Bou di e marka aki algun luna pasá el a lansa The Krioyo Chic Collection. Ku eksperensia den ‘Fine Arts’ i teknologia, Hasham semper tabata interesá den karpinteria i tambe a eksplorá eskultura dor di inkorporá formanan úniko den su diseñonan. Na 2015, Hasham a keda inspirá pa lansa NO/R, debí na su amor pa moda i modernidat. Ta trata aki di su inspirashon meskos ku tur su otro produktonan, ku ta su ekspreshon di Kòrsou. Krioyo Chic ta representashon di kiko e ta awor. ‘Nos tur ta pasa dor di kamindanan largu i Krioyo Chic ta un inspirashon i un meskla di su desaroyo na Kòrsou i loke e ta kòrda kon el a krese. Kon el a keda afektá dor di move komo un persona di un isla chikí. Kòrsou ta spesial den tur sentido. I p’esei dikon no tuma e parti kultural i p’esei Krioyo Chic, un representashon di kaminda e ta awor aki.
Kòrsou su inspirashon
Stephanie semper a usa Kòrsou pa e keda inspirá. Su karera na Merka tabata den teknologia i e motibu ku e ta den dje, ta e kuriosidat pa arte. I tambe el a kuminsá wak arte pa algu pa generá su entrada. E lès ku el a siña na Kòrsou, ounke e tabata traha entre otro na Microsoft, el a siña e ingenuidat ku e mester, pa krea algu riba nos isla i tambe pa ekspandé riba e ideanan ku e tin. E idea ta krea balor den algu ku a kuminsá di nada.
Duradero i sosteníbel
Di tur e materialnan ku el a traha kuné, el a keda ku esun di kueru. El a bisa Djasabra ku kueru ta esun ku ta sosteníbel, duradero i bo por tin e pa hopi aña. Nos mama i tata tabatin tasnan di kueru ku nan a pasa over pa nan yu. E ta kòrda tasnan di skol tambe di kueru i tur a keda trese rekuerdonan masha bunita pa Stephanie. E motibu dikon e ta traha ku kueru ta pasobra el a disidí ku e ta traha tas, pero no di mas. E ta traha algu ku e struktura ku e ta gusta hunga kuné i tambe ku otro hende por siña for di dje. E intenshon di No Rehearsel ta traha produktonan sosteníbel i ku no ta kontribuí na desperdisio. Di e forma aki e por ofresé un pida di su mes ku por tin e pa añanan. E ta algu duradero i ta un di su sorto so tin.
Eksklusividat
Stephanie no ta traha mas ku 11 di un tas. Esaki ta hasié eksklusivo i tambe keda inspirá su mes basá riba eksperimento ku diferente tipo di material. Tin hopi tipo di kueru na mundu i esun ku el a skohe pa Krioyo Chic ta kueru italiano. Usando e tipo di kueru aki e ta siña komuniká ku e produkto ei, manera nan a trahé, pa asina trese e idea dilanti. Kada tas ta un obra di arte ku ta reflehá e pashon di Hasham pa krea diseñonan yamativo ku ta inspirá konfiansa i ta koutivá e stimadó di moda. Segun Hasham, e marka NO/R ta un eksplorashon kuidadoso di teknologia di futuro, sostenibilidat i fasilidat di uso den e kreashon di artesania portátil. “Nos mester biba nos bida ku pashon i sin miedu, pasó no tin ensayo den bida”, Hasham ta splika.
Sigui padilanti
E nifikashon di su produktonan ta un tiki pisá pero ta lag’é kòrda tambe kon importante ta pa rekonosé e tempu ku nos ta aden, miéntras nos tei riba e mundu aki. Tempu por pasa lihé. El a skohe e nòmber No Reahersel a base di diferente situashon ku a pasa rònt di dje, entre otro el a pèrdè un hopi bon amiga ku kende e tabata papia hopi di su ideanan kuné. Nos tur por pasa den kosnan pisá i kontentu pero No Rehearsel ta poné reflekshoná, ku nos no por bai bèk den tempu pero nos tin di sigui padilanti.
Arte i teknologia
Tempu Stephanie a kuminsá traha tas, nan no tabata asina bunita. E ta konsiente ku el a traha hopi kos mahos den e proseso pa siña kon pa traha ku e material. I tòg e kos ei a pone mantené su mes na loke e tabata hasiendo, sigui bai pa mira finalmente si e por hasi algu di su mes. Tabata fásil pa e laga otro hende traha tas pe, pero komo e ta un artista, esei ta su ‘background’, e kier a wak kon e kos ei ta hinká den otro. El a hasié miéntras e tabata traha na diferente kompania di teknologia komo ‘product designer’, i a ripará ku e dos mundunan ei ta pas ku otro. Tur dos tin di aber ku hende. E ta puntra su mes dikon hende ta disidí di hasi sierto eskoho. Ta un pregunta simpel por ehèmpel dikon un tas, dikon e tas ta laga bu sinti bon, sinti bu bunita, e manera ku ta ekspresá. ‘Tur e preguntanan ei nos ta puntra nos mes promé ku bisti nada tur mainta. I No Rehearsel ta un práktika pa Stephanie. E manera ku e ta komuniká ku e marka ta un inspirashon di tempu, sigur di kiko e ta hasiendo ku su tempu.
Kada un ta diferente
Stephanie ta establesé na Merka pero su klientenan ta rònt mundu. E ta na Hulanda, Canada i tambe na Kòrsou. Basta haña chèns di kumpra e produkto lihé, bo ta logra pone man riba un di e tasnan. Kada tas ta apart. E ta traha tambe riba pedido di koló. E manera ku por por haña un di e tasnan aki ta dor di bishitá No Reahersel.co i einan por mira e tasnan di mas resien i tambe via Instagram Norehearselco. Pa loke ta Kòrsou e ta buskando si tin un ke otro negoshi ku ta bende produktonan limitá pa por bende su tasnan. E ta wak na Merka kon e merkado ta bai i asina e por pone nan den tienda na Kòrsou i Hulanda.
Krioyo Chic ta su promé kolekshon real ounke promé kue sei e tabatin Tokyo Collection ku tabata mas bien unu pa fula tera pa mira si ta algu ku hende ta interesá den dje. I dikon Tokyo Collection; segun Stephanie, su mayornan ta biba na Hapon pa algun ratu kaba. Dia el a bai bishitá nan el a keda inspirá pa e medio ambiente, kon e hendenan ta trese nan diseñonan dilanti i esaki a pas ku su vishon. Ounke Kòrsou ta keda su punto di konsentrashon.
Kolekshon anterior
Na sèptèmber 2022, Hasham a lansa ‘The dollhouse collection’, su promé seri di artíkulonan kla pa benta, huntu ku un eksibishon di portrèt di realidat oumentá. ‘THE DOLLHOUSE COLLECTION’ ta un kolekshon limitá di tas miniatura i ‘cardholder’ trahá na man di kueru genuino, ku un estilo klásiko i yamativo. Despues di un biahe pa Hapon na 2022, Hasham a lansa un seri limitá titulá ‘tokyo series’, unda el a eksperimentá ku ‘patina’, forma i tiponan di kueru nobo. Enkurashá pa e komentarionan positivo, Hasham ta sigui traha duru riba e próksimo kolekshon di tas i diseño.
Dikon studia arte?
Segun Stephanie, tempu ta kambia i hopi lihé. Arte ta algu ku ta un hèrmènt ku por usa den kualke rango di trabou. I no arte so pero e manera di pensa pa yega na un eskultura òf pinta algu. Si pensa bon e ta tuma diferente paso. Ora bo yunan haña oportunidat pa pensa un manera solushoná un problema, arte ta duna 10, mil òf mas. Hende hopi bia ta pensa riba buki di klùr, i kosnan bunita pero e ta un manera di pensa, biba i hasi pregunta na mundu. I e manera kon artistanan ta kontestá ta ku nan a komuniká algu di loke nan tabatin disponibel pa usa, e hendenan rònt di nan ku a pone nan resaltá i ta ripará kon hende ta pone balor na esakinan. E tipo di pensamentu ei ku el a haña oportunidat pa sigui eksplorá, arte a hib’é pa e traha pa kompanianan grandi manera Orco, Microsoft. E manera di pensa, e téknika di loke ta mira i loke ke ofresé un persona sea un software òf un tas ta e manera ku bo ta solushoná problema. Ku arte e no ta e final pero ta sigui evolushoná. Si mira kon ekonomia ta bai, kon e desaroyo ta bai ku ántes e tabata tuma añanan pa e kana, awor por mira ku den algun minüt e kos ta bai rònt mundu. I esei ta importante pa no baha balor i importansia di e habilidatnan di un hóben òf adulto ku ke drenta den e tereno i eksplorá nan mes. E disiplina di arte pa sigui dal bai i pa tin kurashi pa mustra kos ku tabatin miedu di dje. Arte ta duna oportunidat pa mustra kon e kos ta, bo ta keda komuniká. Si e mucha ta interesá pa traha tas òf muebel òf kose, eseinan ta kosnan ku for di chikí a habri su mente kon kos ta hinká den otro i tambe kon kos por plama for di otro. E ta enkurashá tur hende pa hasi bo kos, tuma kurashi pasobra arte mester di esei i eksplorá kon arte por hiba bu mas leu.
Kreatividat no pa artista so
Stephanie ta hopi kontentu ku for di chikí el a haña oportunidat pa e por a ekspresá su mes i e amor ei ku el a sinti i ku e por a hasi. Kreatividat no ta pa artista so, pero pa hendenan ku semper ta pensa kiko ta bai hasi. Kreatividat pa trese kosnan bunita dilanti.
Kontakto
Pa diskubrí e diseñonan úniko di NO/R, bishitá e wèpsait www.norehearsal.co òf chèk e Instagram @norehearsalco pa keda na altura di e último notisia i detaye di e último kolekshon.
Fotonan di
Diana Ward (di Atlanta) i Helouise Verstraete pa Farrielle Photo
