Sonia Baromeo presidente Nos T’ei Pa otro i Linda Terpstra Terapista

 “Yudansa propio: yuda esun ku ta duna yudansa” tabata tema di e konferensia ku Fundashon Nos T’ei Pa Otro a organisá i ku a konta ku e terapista profeshonal i rekonosé Linda Terpstra. Buska solushon pa situashonnan di problema kompliká ku esun ku ta duna yudansa tin di atendé kuné diariamente miéntras ku esun ku ta duna e yudansa ei mes tambe mester di yudansa den su bida propio. E tas invisibel ku e ta karga riba su lomba ku niun hende ta wak, pero ku ta un peso i por tin su rastronan na momentu di duna e yudansa. Esaki tabata e punto sentral pa e konferensia ku Fundashon Nos T’ei pa Otro a organisá huntu ku Cafra netamente den e siman di violensia kontra hende muhé. Ta den e kuadro aki Linda Terpstra taba’tei komo eks direktor i presidente di direktiva di Fier i aktualmente konsehero stratégiko di Fier. Sonia Baromeo i Linda Terpstra tabata di bishita serka Djasabra. Linda a nase na Kòrsou, el a biba te ku su 15 aña aki i despues a bai Hulanda.

Kibra e kadena

Linda a duna un bista di e konferensia i el a splika ku aña pasá den luna di aprel fundashon Nos Tei pa Otro a kumpli 35 aña  dunando yudansa na drogadiktonan i tambe e hende muhé den krísis. Durante di e dos dia di konferensia, Linda tabata  e orador prinsipal i el a papia di violensia relashonal. E título tabata e komportashon Intergenerashonal. Esaki ta nifiká ku bo a bati bo yu, e yu ta bai bati su yu, un kadena. Linda a papia amplio kon pa kibra i stòp e patronchi ei, tambe el a papia di unda e ta bin ku ta difísil par’é, pero un kaminda tin di kuminsá. Despues di e konferensia ei spesial pa e dunadónan di yudansa pa nan aplik’é den nan trabou, den nan evaluashon nan a skibi ku nan ta yuda e víktima, i e kliente pero ken ta yuda nan. I basá riba esei komo el a bin di diferente ángulo, e personanan ku a bai ku e konferensia no tabatin nada di haber ku otro pero individualnan a skibi ken ta yuda e dunadó di yudansa ora nan mester di yudansa.

E maleta invisibel

Linda ta bin Kòrsou konstantemente i semper el a mustra su disponibilidat pa Fier yuda. Sonia a bishitá Fier i a mira kon aki tin di yuda nos hendenan. I asina e aña aki Linda a bin i a prepará un konferensia práktiko i el a papia di e “onzichtbare koffer” esta e maleta invisibel. E referensia di kon ta trata e kliente ta bin di e maleta ku niun hende ta mira ku bo ta kana kuné. I Linda a habri e maleta i a papia di dje. Ku e maleta invisibel Sonia a sigui splika ku e hendenan a para ketu ku si e dunadó di yudansa ta iritá ku e kliente, ta kiko a sosodé ku e mes komo dunadó di yudansa den pasado. I Linda a pone nan bai bèk pa nan mes kiko ta e kosnan ku mester drecha pa duna prioridat.

Un sentro di ekspertisio

Linda a konta nos di Djasabra ku ta pa hopi aña kaba e ta asistí fundashonnan na Kòrsou ku yudansa meskos ku na Aruba i ta stashoná na Hulanda. 8 aña pasá Fier a afiliá na Aliansa aki na Kòrsou i nan a bisa semper ku si mester di yudansa i sosten nan ta duna gustosamente. Fier ta un sentro ku ekspertisio riba tereno di violensia den relashon i esei ta pa hende muhé, hende hòmber, mucha ku tin di haber ku violensia doméstiko, abuzu seksual, maltrato di mucha, tráfiko di hende, hende troumatisá na edat yòn i hopi tópiko mas nan ta atendé den Fier. Nan ta ofresé yudansa na hóbennan, sentro di krísis, nan tin shelter i GGz . Hopi bia ta mira ku hendenan ku a pasa den hopi kos tantu violensia komo abusu seksual, si nan no haña yudansa pa atendé ku e kehonan di trouma, por mira ku e ta pasa over pa e mucha i e patronchi di violensia ei mester kibra pa para e violensia.

Fier ta bin yuda aki tambe

E ta fundadó di Fier i for di kuminsamentu Linda a bisa ku Kòrsou ta su pais pasobra el a nase aki i krese aki i kaminda e islanan aki mester di yudansa, e ta hasié gustosamente. E tin bunita rekuerdo di Kòrsou, e ta bin aki sigur dos pa tres aña i na Aruba tambe el a kuminsá duna yudansa 8 aña pasá. I loke ku pidi nan di yudansa, nan tei pa tantu Aliansa, i Nos tei pa otro. E ta hasié for di Fier pero e ta hasié tambe for di e mes. Ta importante ku ora ta papia di status di reino, e paisnan den reino mester yuda otro. I yuda pasobra bo ke yuda i enpartikular ku e konosementu. E no ta solamente duna pero tambe tuma. Tin hopi boluntario di Fier tambe ta bin aki i yuda. E no ke pa pensa ku loke nan ta hasiendo na Hulanda ta mihó ku loke ta sosodé aki, pero mester siña aki tambe.

‘Blaming the victim’

Fier ta stashoná na Rotterdam Capelle i Leeuwaarden i loke e a mira aki ta ku na e islanan tin hopi violensia relashonal i hopi abuso seksual i mal uso seksual. Unda bes bo a keda mal usá seksualmente, pa 50% bo tin chèns ku e ta sosodé atrobe kompará ku un hende ku nunka a pasa den esei. Si un mama òf tata a keda mal usa seksualmente a sali a kla ku e mes no por protehá su yu, si e mes no a atendé ku e problema ei i si ta difísil pa bo papia di dje. Por mira ku hende tin problema papia di loke nan a  pasa aden i pa dos motibu. Un di nan ta e bèrgwensa i na di dos lugá ‘Blaming the victim’ esta kiko a sòru ku a kondusí na e situashon. Akusá e víktima ta un problema masha grandi segun Linda. I no por papia bisa otro ku adultonan mester keda ku nan man for di mucha. I si e sosodé tòg, e adulto ei semper ta responsabel i ta robes. No por bisa ku ta e mucha mes tabata ke, ku e mucha a bisti paña poko sunú, e mucha a madurá lihé, ku e mucha a kana den un kaminda skur etc., etc.. Ta kosnan ku segun Linda ta bin dilanti masha hopi. Ta kosnan no aseptabel. I por mira na Kòrsou mester hasi algu. Ta un área ku no por, keda ku bo man leu for di e mucha i si bo hasié abo komo adulto ta robes, Mester protehá e mucha i enbes di kulpa nan mester bisa nan ku no ta nan falta.

Bo ripití eror

Den e konferensia no a trata solamente abuso seksual pasobra nan sa ku tin hende den e konferensianan aki ku tambe tin eksperensianan amargo i p’esei mester a wak den e maleta invisibel pa asina no hasi e otro erornan manera otro adultonan ku ta bai reprodusí historia. E ta eksihí reflekshon, wak den e spil di kiko bo a eksperensia. Nan a atendé den e konferensia ku ora bo ta duna yudansa, bo tin di sòru pa bo mes tambe. Sòru pa bo mes ta importante pa hendenan por kai afó, no ta felis asta den nan trabou i hopi keho di strès. Linda ta kontentu ku Sonia a organisá e konferensia pa e sektor di kuido kompleto i ku e por a duna un yudansa.

Interes

Pa loke ta e konferensia, Sonia a splika ku esaki a keda bon bishitá. Den kareda di 70 hende a inskribí repartí den 2 dia. Ta for di yùfrou di skol, remedial teacher, abogado , sikiater, dunadónan di yudansa. Sonia ta kòrda ku un di  e partisipantenan a bisa ku e tabata duda di bai e konferensia aki òf no pero ora el a tende Linda papia ku bo tin di traha na bo mes, bo mes tin di buska yudansa, e persona aki a komprondé kon e tambe tin di traha na su mes pa asina e por yuda su klientenan. E parti bunita ta ku Linda a laga e partisipantenan traha un tarea di kiko ta duna nan energia, kiko no por, e síntomanan ku bo ta rekonosé ora pa trata un kliente. E hende ta mira su mes den e kliente i ta proyektá riba e kliente nan frustrashon. Por tende hende bisa ku ta e kliente su falta pero kiko ta sinta serka bo mes, ku bo tin di traha riba dje pa duna un mihó yudansa. Hopi partisipante a bisa ku awor nan sa na kiko nan tin di traha. Nunka nan a tende di nan maleta invisibel.

Un lugá sigur

I awor kon lo bai sigui. Linda a bisa ku e tin un soño. Nan ke tin un lugá sigur pa hende na Kòrsou. I ku un lugá pe ta un lugá safe, un lugá kaminda ku e hende ku no ta sintié safe por keda einan. I no solamente bo ta na e lugá pasobra bo tin un pasado pero pa traha riba futuro. Nan ta tira bista riba e loke a pasa i pa sigui den bida. Un lugá ta ofresé no solamente seguridat pero ta keda atendé pa medio di sikólogo, sikiater ku ta bin einan pa atendé e hende i tambe partisipashon den komunidat bèk. Traha bèk na bo mes pa bo tin chèns den merkado laboral i bo ta bira visibel pa e komunidat ku bo ta biba den dje. Esei ta e konsepto ku Linda ke logra i ta spera di haña hende pa invertí den dje. Linda ke hasi tur loke ta posibel pa hasié. E lo ke haña empresanan ku ke invertí den komunidat. E ta mira kaba e dunadónan di yudansa pa pone man huntu i no ku un grupito aki i aya un grupito. Ta huntu bo ta mas fuerte.

Traha na bo mes

Den e konferensia aki Linda a duna hopi tep i konseho. Entre otro papia ku bo doño di trabou i no simplemente bisa ku e no ta kere. Kumindá atendé den grupo. No kuminsá ku algu grandi pero algu chikí i asina sòru na bo mes. Sòru drumi bon sino bo no por yuda e kliente. Hasi deporte, kome salú. Tur ta kosnan ku por kondusí na ‘Burn Out’. Un dunadó di kuido ku ta di ‘burn out’ no por funshoná.