QUITO, AP.- Ecuador ta na punto di firma un krédito di 1.000 mion dòler ku China ku e intenshon di avansá den konstrukshon di provinsianan di Manabi i Esmeraldas, asotá pa un temblor potente kasi un aña pasá.
Presidente Rafael Correa a bisa den un entrevista na Radio America ku den próksimo dianan un ekipo di ministerio di Finansa lo biaha pa e pais asiátiko i asina firma e krédito. China ta un di e prestamistanan mas grandi di Ecuador.
E mandatario a presisá ku e préstamo a wòrdu ofresé durante e bishita ofisial di mandatario Xi Jinping di China den luna di novèmber. El a menshoná ku e kondishonnan lo ta: 20 aña pa paga bèk ku un interes di 2%. El a agregá ku e fondonan ta wòrdu usa pa obranan di rekonstrukshon.
Dia 16 di aprel di aña 2016, un temblor di 7.8 grado di magnitut a kousa gran destrukshon den pueblo di Portoviejo, Manta i Pedernales. Akinan 673 persona a muri i Correa a kalkulá ku e pèrdidanan ku e áreanan a sufri ta di 3.000 mion dòler.
Te ainda, e debe di Ecuador ku China ta na 8.395 mion dòler, alrededor di 8% di Produkto Bruto Interno, segun sifranan ofisial.
