RIO DE JANEIRO, AP.- E fiskal venezolano, resientemente destitui, a akusá presidente Nicolas Maduro di partisipá den aktonan di korupshon. El a bisa ku e lo proveé prueba ku ta yuda otro paisnan demandá e presidente.
Luisa Ortega Diaz a papia durante un reunion di fiskal di e bloke komersial Mercosur na Brasilia. E Asamblea Konstituyente nobo, integrá pa partidarionan di Maduro, a destitui Ortega den ougùstùs, despues ku el a kibra ku e gobièrnu sosialista. Despues ku tribunal Supremo di Hustisia a ordená detenshon di su kasa, Ortega i su pareha a hui di e pais.
E fiskal general venezolano Tarek William Saab, a afirmá ku e indagashonnan di Ortega “no ta bálido” i a bisa den un konferensia di prensa ku e eks fiskal mester a presentá su akusashonnan dilanti e sistema venezolano.
Ortega a bisa ku e tin prueba ku ta impliká Maduro i otro funshonarionan den aktonan di korupshon ku ta embolbí e kompania di konstrukshon gigante, Odebrecht. El a agregá ku e tin informashon di mas empresa, sin menshoná nòmber ni duna detaye.
Odebrecht ta e foko di un investigashon masivo na Brasil, kual ta involukrá entrega di kontraktnan a kambio di sobrono. Den último tres aña, desena di polítikonan i empresarionan a wòrdu enkarselá, inkluyendo e eks direktor general di e empresa, Marcelo Odebrecht.
