GUATEMALA, AP.- E eks minister di defensa di Guatemala Williams Mansilla a keda detené djabièrnè pa a ordená pago di un bono ekstraordinario na e mandatario Jimmy Morales den un di e skandalnan mas resien ku a sakudí e nashon sentro amerikano aki.
E ministerio públiko a konfirmá e detenshon di general retirá Mansilla den un kaso ku segun outoridatnan tin di aber ku e desishon di eks minister di a outorisá e bononan na gobernantenan i tambe pa e mes. E entidat di investigashon a referí ku e kaso a keda adelantá pa fiskalia komo labamentu di plaka i otro aktivo mas.
Mansilla a keda hibá dilanti di un hues ku a inform’é di e motibunan di su detenshon ku a tuma lugá den un residensia, asina a informá.
Segun e investigashon, Morales a risibí bononan di te asta 61 mil dòler den 9 luna ounke na sèptèmber pasá e kontrolaria di kuentanan di e nashon a ordená e mandatario pa debolbé e sèn.
Fiskalia general a pidi e luna ei pa kita e imunidat di Morales pa por investig’é pero a keda rechasá pa korte supremo di hustisia. E desishon a keda apelá posteriormente i ta pendiente di e resolushon di korte di konstitushonalidat.
Morales konsiderá un di e presidentenan mihó paga di latonoamerika ta haña un salario di 20 mil dòler pa luna. Siman pasá un reportahe di prensa a indiká ku e gobernante a paga gastunan personal pa mas di 40 mil dòler na paña. Sapatu, masashi, likor i brelnan di luho ku e sèn di pueblo.
E mandatario guatemalteko ta den bista di públiko pa algun lugá kaba, ora na ougùstùs di 2017 fiskalia general i e komishon internashonal kontra inpunidat di Guatemala a pidi pa kita su imunidat pa asina por investigá pa presunto finansiamentu elektoral ilegal di kampaña elektoral di partido Frente de Convergensia Nacional ku a pone na poder na 2015.
Dos dia despues di konosé e proseso kontra di dje Morales a ordená e ekspulshon di e pais di Ivan Velasquez titulá di e CICIG kreando un krísis grave den gobernashon di e pais. Sinembargo un desishon di korte a evitá ku Velasquez ta sali di e pais.
