Eks-presidente di Sürnam Bouterse sentensiá definitivamente na 20 aña di prizòn

PARAMARIBO – Eks-presidente di Sürnam Desi Bouterse awe a keda sentensiá definitivamente na 20 aña di kastigu di prizòn pa su envolvimentu den e asina yama ‘December-moorden’, ku ta asesinatonan di desèmber di 1982. Korte di hustisia di Sürnam den apelashon a konfirmá e sentensia aki di e eks-presidente.

Bouterse (78) mes no tabata presente pa e sentensia, su abogado Irvin Kanhai a bisa ku el a konsehá Bouterse pa tei presente. Ministerio Públiko a eksigí 20 aña den e apelashon. A pidi tambe pa detené mesora pa enkarselashon, algu ku no tabata pidi anteriormente. Sinembargo Korte no a honra e último petishon aki.

Pues Bouterse no mester presentá mesora na prizòn. E kaso ta trata di un kaso di asesinato di 15 persona kontrinkante di e régimen di Bouterse ora ku e tabata diktador di e pais. E kaso a tuma lugá e anochi di 7 pa 8 di desèmber 1982.

Ta trata di periodista, sindikalista i abogadonan ku a wòrdu tira mata e anochi ei. Na 2019 Bouterse a wòrdu sentensiá kaba. Pero Bouterse a apelá i na 2021 tabatin un sentensia igual. Aworakí e sentensia aki ta unu definitivo.

Abogado di Bouterse, Irvin Kanhai. PORTRET AFP

Outoridatnan na Sürnam ta teme disturbio despues di sentensia di Bouterse. Pa e motibu polis di Sürnam a instalá un plan di seguridat. Komo parti di plan di seguridat di polis na Paramaribo tin desviashon, blokeo di kaminda i èkstra kontrol di seguridat. “Polis ta alerta, ku sosten di otronan servisio di seguridat”, minister di Hustisia Kenneth Amoksi a bisa.

Vários negoshinan i skolnan den bario di e edifisio di korte ta keda sera awe. Algun biaha pa motibu di seguridat, pero tambe pasobra pa nan ta difísil di yega debí na desviashon di tráfiko.

Embahada Hulandes na Paramaribo ta avisá pa posibel instabilidat rondó di edifisio di korte. Embahada Merikano ta konsehá pa no bai serka korte.

Presidente di Sürnam, Chan Santhoki, a splika ku e ta komprondé e impakto emoshonal di e kaso aki i ta pidi unidat, responsabilidat i rèspèt pa e estado di derechi’. Segun Santhoki e gobièrnu di Sürnam ta hasiendo tur kos posibel pa mantené e kalmu.

Bouterse mes durante wikènt último a yama tambe na míles di partidario pa mantené e kalmu. Pero den mesun diskurso, e ekslider militar a yama e kaso un proseso polítiko i un intento di e “kolonisador” pa eliminá su persona. Segun Bouterse mester tene kuenta ku “e situashon por sali for di man.”

Bouterse mes no a reakshoná riba e sentensia te ainda, su abogado ta bisa ku e ta hopi desepshoná. Famia di víktimanan di ‘December-moorden’ a bisa prensa na Sürnam ku nan ta hopi kontentu ku e sentensia definitivo di Bouterse. I ku nan ta spera ku Bouterse tin ku bai prizòn mas lihé posibel.

Bouterse awe e no tabata presente pa e sentensia. Djasabra último el a partisipá den un evento di su partido NDP. PORTRET AFP