Eksperensiá Kòrsou di otro forma

Sharalin Maduro; Nostalgia

Nostalgia ta ofresé un eksperensia úniko na nos hendenan lokal pero tambe na turistanan. Sharalin Maduro a bin ku e idea aki. Den su kas di kunuku na Wacawa nos a papia ku Sharalin ku a konta kon bin e idea i kiko tur e ta ofresé. Nostalgia Tours and Accomodation a keda establesé na 2016 na momentu ku Sharalin tabata den fase final di kurso di Tour Guide. Segun e kurso tabata bai, e tabata haña e idea ku e no ke ta e guia pa e turista pero e ke ta esun ku ta pensa kon ta hinka esaki den otro. Tambe el a sinti ku e kliente no mester ta solamente den bùs pero eksperensiá mas kos di Kòrsou. E no por splika kon e ideanan ta bin pero nan ta bin si. Semper di su bida e tabata ke un lanthùis òf kas na Bándabou pero el a traha kas na Bándariba. Pero e oportunidat a presentá pa e kumpra e kas di kunuku. El a kumpr’é na desèmber 2016 i einan e ‘Journey di Nostalgia’ a kuminsá.

E “brain” tras di e guia

Sharalin a konta Djasabra ku promé ku esei e tabata hasi tour pa hende lokal i mayoria hulandes. E ta yam’é mas bien un eksperensia pasobra e ke pa e kliente ora e sali e evento e kòrda algu, e tin un eksperensia ku el a biba. P’esei nan ta bisa “we create unique activities for unforgettable  experiences”.  Asina a kuminsá organisá eventonan. E promé tabata un Moon Watch Hike. Tabata luna yen i a hasié na Caracasbaai kaminda e kliente a tende historia di e área i na final wak e luna den un teleskop. Esei ta un eksperensia ku nunka hende lo lubidá.

Eksperensia úniko

Atraves di aña  nan a krea hopi eksperensia i huntu kuné un database grandísimo di kliente lokal. Te e klientenan mes ta puntra ki dia tin kos. Otro aktividat tabata e Safari Campfire Hike, esta kana i na final un kampamentu. Pero esakinan e tempu ei no a kuminsá for di e kas di kunuku pasobra ainda mester a restourá esaki. Segun Sharalin, Monumentenfonds a bin wak i a bis’é ku ta un kas outéntiko i einan e proseso pa hasié monumento a kuminsá. E proseso ei a dura 6 aña. Durante di e tempu ei no tabata hasi kos einan pero tabata buska áreanan diferente. Por ehèmpel Ascencion tabata e lugá pa nan hasi e Campfire Hike. Einan nan tabata kana den e área i na final un ‘kampvuur’ i sinta bebe sòpi i disfrutá.

Nostalgia a haña forma

Sharalin ta traha den estrecho kooperashon ku Carmabi di Kristofelpark. Einan nan ta hasi e trepnan ku jeep i kada bes ku algu otro manera Wine and Cheese riba seru bientu, òf na e ruinanan di Zorgvliet ta pone komementu anochi òf desayuno mainta. Asina e nòmber Nostalgia a haña su mes forma. Manera e nòmber ta bisa, Nostalgia ta hiba bu bèk den tempu i ku un toke di awor aki, e eksperensia di awor. E eksperensianan aki ta trese hopi interes pero di un grupito spesial. E ta kòrda su promé tour di moon watch hike, e hendenan a kustumbrá di paga den kareda di 15 florin pero serka dje ta mas tantu manera e tin teleskop, e tin kos di kome i bebe i no ta sirbi den kùp pero ta usa glas. E ta algu mas elevá ku normal. Tin hende no ta pag’é pero kada ken ku nan smak, pero e tin un grupo di sigur 100 hende ku ni maske kiko e ta kosta nan ta pag’é.

Hulandesnan ta gust’é

Pa loke ta turista, hopi bia ta grupo. E ta haña hopi hende di Hulanda ku ta forma grupo i bin serka dje. E ta riba Viator i einan  a haña parehanan di Latino Amérika. Esnan mas interes ta e hulandesnan. E bishitantenan aki ta keda semper enkantá ku loke nan ta eksperensiá serka dje.

Monumento

E kas di kunuku na Wacawa kaminda Sharalin ta establesé, tabata biba un pareha. E señora tabata flèktu sombré i e mener tabatin kunuku. Nan no tabatin yu i den e área ei mayoria di e kasnan tabata asina. Despues di abolishon di sklabitut hopi hende a haña pida tereno. I asina e barionan a forma den área di Bándabou p’esei e terenonan ta grandi. Nan mes mester a proveé pa nan mes dor di planta p’esei nan tabata kome hopi kos di tera. Asina e bario ei a lanta. Komo e pareha no tin yu, e famia a heredá e kas i asina el a logra yega na dje. Kaminda e ta ta Wacawa i den e hanchi tin un pos i einan e hendenan tabata bai kue awa pa usa. Ora el a kuminsá ku e proseso pa hasié monumento, e no tabatin mag di mishi mas kuné. E bentana tabata yalusí i tegel den e kas. Monumentenfonds a bis’é e no mag di mishi kuné. E no tabatin mag di ni fèrf pero a logra hasié di e mesun koló. I asina el a hasi un ‘dinner’ einan. El a warda te ora e proseso di hasié monumento finalisá i asina a kuminsá e renobashon. Esei a finalisá aña  pasá i awor ta un aña. E renovashon ta kla, paden el a laga keda meskos. E por a pone flur di palu òf semènt i el a opta pa flur di semènt.

Na kas di kunuku Wacawa mes

E eksperensianan di nostalgia awor ta sosodé for di e kas di kunuku. Si nan tin kaminata nan ta kumins’é den un área di Bándabou i kab’é einan òf ta kuminsá for di einan. Na desèmber e tabata kas ful di hende ku kier a hasi algu einan. Tin hende ta puntr’é pa menú pero e ta traha segun e hende ke. Su eksperensianan ta úniko pasobra ta segun e kos bin den su kabes e ta hasi. Tempu el a kaba di limpia parti patras tin un área ku ta mira te Landhuis Klein Sta Martha. Einan el a pone algu ku luna yen i konta historia. Crisen Scorea a bin einan i a deklamá. Tur hende sintá ku nan stul òf riba kusinchi i a gosa di e ambiente.

Yerba di Kòrsou

Den kurá e tin basta yerba di Kòrsou plantá. Sharalin a konta ku aña pasá tabatin un proyekto ku yama “Wacawa Experience” i ta algu ku ta bin kunuku i eksperensiá loke hende ta hasi ántes manera traha den kunuku, traha pan será, bai dal un keiru i bisti paña di kunuku i saka potrèt. Awor tur hende ku bin kunuku ta haña te òf algu friu di bebe trahá di e yerbanan einan. Asta e tin pa kushiná kuné.

Mas atenshon na servisio

Pa loke ta e desaroyo di turista na Kòrsou Sharalin ta kere ku pa e krese aun mas nos hende mester kambia mentalidat i bira mas ‘service minded’. Ounke turismo ta krese nos hendenan karesé di e gana i abilidat di duna servisio. Personalmente e no ta wòri ‘app’ e produkto pero su eksperensia ta e servisio ku bo ta duna. Esei ta masha importante pe. E tabata kome hopi afó ántes i tabata un frankisia ku e ta bai tur mèrdia i tur e trahadónan konosé. E ta kòrda un bia el a yega i un di e trahadónan a bin bis’é mesora ku e preisnan a subi. Esei ta mustra atenshon. I nos na Kòrsou pa turismo krese mas nos tin di hasi den tur área. Servisio ta importante. Dor di un poko barera ku e idioma nos hende ta poko ‘schuw’ òf no ta wak hende den kara ora di duna servisio. Esei ta masha importante pa un turista.

Unda e kos a bai robes

Turismo ta e pilar ekonómiko i mester kuminsá for di awor ku nos muchanan. Si hasié awor, pa aki 10 aña  bo ta kla i purba wak kon ta hasié ku esnan di awor. Kisas e parti di duna servisio ta un estorbo pa hopi hende. Pero si wak islanan banda di nos, ta servisio pa nan ta tur kos, for di ora yega airopuerto. Tin bia Sharalin ta pensa ku e tin  i aber ku nos ansestronan pero tòg no pasobra ántes nos komo mucha ta kuminsá sino ta haña un klap. I p’esei e ke sa unda e kos a bai robes. Si ke pa turismo krese, mester pone atenshon na esei. Tin hopi kurso den turismo pero kisas no ta sufisiente largu pa duna hende tur kos. Si ke haña hende mester hasi kurso pa haña hende. Sigur tin un kaminda pa kana i e tin di aber ku e edukashon ku a kambia riba kaminda. Tin hopi kos pa hasi, tin hopi kos pa inventá pasobra na Kòrsou por hasi hopi.

Kontakto

Sharalin ta pone su eksperensianan riba Facebook Nostalgia Tours & Accomodation kaminda tin di registrá. Unda bes registrá ta haña tur e-mail. I e ke enfatisá ku mirando ku e ta para pa servisio e no ta yena su ‘tournan’ ku yen hende. Su gruponan no ta grandi. E ta gusta yama hende na nan nòmber. Pe ta importante pa e hende sinti ku e ta dun’e atenshon.