Empresario di Jamaica ta kumpra Hucor Holding (Subway, Pizza Hut i KFC)

Magnate hamaikino entre dunadónan di trabou ku mas tantu empleado

KINGSTON,JAMAICA/

WILLEMSTAD.-Mundu empresarial na Jamaica ta mira ku atmirashon kon Gassan Azan, empresario hamaikino sumamente poderoso ta kumpra otro grupo di empresa importante den ekonomia di Kòrsou. Asina ‘The Observer’ a informa na Jamaica. E kompra di Hucor Holding, ku ta e kompania lokal representante di restorantnan fast food KFC, Pizza Hut i Subway na Kòrsou, ta un kompra ku ta kubri hopi mion dòler merikano. Aparte di e restorantnan di fast food Azan su kompania ta haña kontrol riba Diamond’s Party i Diamond’s Home i tambe Antillean Pet Containers. Tur ta kompanianan ku e invershonista yu di Kòrsou Hubert van Grieken q.e.p.d. a inisiá algun dékada pasá. Ta spera ku dentro di poko tempu tur kos ta kla pa konkluí e benta di hucor Holding pa Alfabet Holdings.

E kompania di Azan, Alfabet Holdings Inc ta tuma rienda di e empresanan aki. Ta bon pa splika ku ya kaba Azan ta propietario di e kadena di supermerkado van den Tweel tantu na Kòrsou, Aruba komo na Boneiru. Azan a kumpra e kadena di supermerkado na 2018. Ku e desaroyo aki Azan ta bira un di e dunadónan di trabou di mas grandi riba e islanan ABC ya ku ta añadí alrededor di 400 empleado mas na e total di 700 trahadó ku ta empleá den e kadena di supermerkado.

Na Jamaica Azan i su grupo ta doño di MegaMart i Bashco ku ta kompanianan hopi grandi. E invershonnan na Kòrsou i otro islanan di eks Antia ta forma parti di plan stratégiko di ekspanshon i diversifikashon despues di kuater aña ku e grupo di invershonista a kuminsá e proyekto Jamagro Tech Farms na Lakes Pen, St. Catherine na 2019. Esei ta un proyekto ‘state-of-the-art’ di agrikultura i industrial na mes momentu. E proyekto aki den e promé fase ta ensera 25 hectar ku ‘greenhouse’ i 50 hektar di orkidia. Ta papia di invershonnan ku hiba embolbimentu di invershon for di Jamaica na US$ 219.69 bion dòler na 2018.

Pa loke ta trata Bashco Trading Company, e informashon ta indiká ku esaki a keda funda na 1990 pa Azan i despues di 9 aña el a lanta MegaMart ku ta e promé ‘wholesale membership club na Portmore, St. Catherine. Awendia tin 12 Bashco i tambe el a ekspandé MegaMart pa Portmore, Montego Bay i Mandeville. Ademas Gassan Azan ta CEO di Sizzling Slots tambe.