E promé direktor di Curaçao Ports Authority
WILLEMSTAD.-Informashon ku a yega mesa di redakshon di EXTRA ta ku siudadano Ernest ‘Jackie’ Voges a bai sosegá den oranan tras di lomba. Esei su famia a konfirmá pa EXTRA. Voges tabata konosí komo un hende di karakter hopi fuerte, stret i asta hopi lo konsiderá ku e tabata un hende difísil pa atendé kuné, sin embargo pa hendenan ku a traha hopi serka kuné por bisa ku Jackie ta kla pa traspasá konosementu. E no gusta nada mediokre i komo tal e ta pusha, spesialmente hende hóben, pa nan bira mihó den loke nan ta hasi.
Jackie tabata minister den kabinèt di Juancho Evertsz, den tempu di Antia. Na momentu ku a surgi problema ku Aruba a manda Jackie pa bai atende asuntunan. Den Bestuurscollege sigur hopi ta korda Jackie. Jackie a bira e promé direktor di Curaçao Ports Authority, e kompania di gobièrnu ku ta manehá hafnan. Semper el a bisa ku hafnan di Kòrsou tin potensial i mester desaroyá esakinan di forma maksimo pa un mihó Kòrsou. Jackie a dirigí diferente organisashon entre otro esnan ku ta boga pa bienestar di monumento. Jackie Voges despues di penshun a tuma enkargo di korant Amigoe kua el a dirigí pa basta aña eksitosamente huntu ku su tim forma e.o pa sra. Ingrid de Maaijer.
Na 2015 a nombra un megapier na su nòmber. Na e okashon ei ya Jackie tabatin un edat hopi avansá i a laga na su tres nietunan pa realisá e parti ofisial pa develá su nòmber na e megapier. E tabata presente den kompania di su kasa May i yunan Robert i Michael i nietunan. Jackie tabata hopi kontentu ku a nombra e pir na su nòmber. El a konsiderá ku di e forma aki a rekonose su trabounan na benefisio di e isla aki. Jackie, un hòmber di karakter fuerte a bai sosegá. Bieu, sosegá na pas. Forsa na famia Voges.
