WILLEMSTAD.- Djaweps siman pasá tabatin un fiesta bailabel di ròlstul na Fundashon Verriet, Sta Maria. Mas o ménos 70 mucha inkluso nan guianan a gosa di e koperashon entre CliniClowns Curaçao ku ParadiseFM.
DJ Maarten Schakel a skohe e piesanan, CliniClowns a animá i boluntario di corporate sponsor BDO-accountants a floria kara di e muchanan ku face-paint. E lokalidat tabata nèchi dòrná basá riba e tópiko ‘flor’. Hopi mucha a bisti paña kolorido pa e fiesta.
“Tabata un honor alegre pa organis’é atrobe,” Eveline van Zanen di CliniClowns Curaçao a bisa. “Biaha pasá tabata na fin di 2019. Kada siman CliniClowns ta pasa un mainta na Verriet di bishita, pero e fiesta bailabel di ròlstul anual ta e chèri riba bolo pa tur hende. Nos a sinti e fiesta akí su falta masha. Kada mucha gusta fiesta, sea sintá den ròlstul òf no, n’ ta importá; djis p’e por ta mucha, ni maske kua limitashon por tin.”
Ta’tin ambiente, masha bailamentu, asta tabatin un mucha ku a hasi aña. Banda di dansflur un mucha hòmber chikitu, pa kolmo, a tuma e tokadisko ofer; at’un futuro DJ! Tur hende a disfrutá; tambe guia ku a mira otro karakterístika i talento resaltá di algun mucha. Mas ku klaro tambe tabatin pasapalu, danki na General Catering. Tabata un mainta eksitoso pa tur hende presente.
Fundashon CliniClowns Curaçao ya pa 14 aña ta sòru pa alegria i distraishon pa mucha ku ta malu òf ku tin limitashon; tambe pa hende ku demensia. E payasonan di trein spesialmente ta bishitá vários instansia gratuitamente i nan ta trese momentu felis pa mucha por sinti su mes mucha, irespekto di malesa o limitashon, i pa saka hende grandi for di nan sintimentu di isolashon.
E fundashon ta dependé kompletamente di aporte di henter komunidat di Kòrsou; entre otro pa medio di donashon (mensual), aktividat di fundraising i patrosinio di Corporate partner.
