Entrega di petishon na presidente di parlamento
WILLEMSTAD.- Habitantenan di aria di Piscadera i Zakitó a entregá siman pasá un petishon na presidente di parlamento relashoná ku e desaroyonan tumando lugá na Zakitó ku konstrukshon di edifisionan ku apartamentu i un marina. E petishon konkretamente ta pa evitá un mayor destrukshon di ambiente di residensia i di bida den aria di Zakitó.
Tabata habitantenan di Royal Palm Resort, Edvin Yrausquin i R. Franken ku na nòmber di 1700 firmante di e petishon a hasi entrega di esaki na Charetti America-Francisca. Den e petishon e firmantenan ta ekspresá nan preokupashon pa e destrukshon kontinuo di medio ambiente den besindario di Zakitó. Ophetivo di e petishon ta pa defendé alabes interes di habitantenan bisiña di e proyekto.
“Kontinuando nos ta splika e preokupashon menshoná, ku e speransa ku abo, komo miembro di parlamento, ta realisá ku interes di habitantenan ta kore peliger debí na proyektonan den e aria di Zakitó bou di e kapa di ‘desaroyo’. Bo supervishon ta nesesario pa evitá ku desaroyo ta limitá pa promotornan privá so, pasobra te ainda no tabatin un evaluashon adekuá di interesnan.”
E firmantenan ta sigui bisa den nan petishon ku ta señalá destrukshon den aria di residensia den besindario i bida di habitantenan ku ta resultado di trabounan di konstrukshon realisá pa promotornan privá konosí komo ‘GMFB Royal Development’ i ‘The View resort & Marina’, tambe ‘Royal Holding I’, ‘Royal Holding II’ i ‘Royal Holding III’. “Gobièrnu ta konsiente di esaki ta responsabel pe.
No a informá habitantenan di e plannan aki, ta sigui bisa den e petishon. “E úniko konsulta ku a tuma lugá tabata ku organisashonnan di gobièrnu i algun NGO dia 23 novèmber 2010 ku ta kasi 14 aña pasá, durante e workshop ‘Visie Rifgebied’.”
E relato ta bisa bon kla ku a boga pa preservá balornan di naturalesa, ekoturismo i, si bai konstruí edifisio, pa limitá esakinan na 2 òf 3 piso. Por haña e ponensianan aki bèk den e dokumento ‘Vishon Zakitó 2018’, pero den esei tampoko a informá habitantenan, ta sigui trese dilanti den e petishon.
“Ainda riba e wèpsait di Ofisina di turismo, CTB por haña esaki i no ta menshoná konstrukshon di un marina, edifisio haltu, daña ekosistema di Palunan di Mangel i refnan di koral ni konstrukshon di un brùg mobil. Pakiko ta konsulta si despues tòg ta ignorá rekomendashonnan i hasi kompletamente lo kontrali.”
Huntu ku e petishon a entregá na presidente di parlamento tambe un karta ku habitantenan di aria di Piscadera a manda pa minister Charles Cooper for di 30 novèmber 2023 den kua ta hasi un kantidat di pregunta ku a hasi den pasado kaba riba e proyekto na Zakitó i ku no a haña kontesta riba nan i alabes algun pregunta nobo.
Foto:
…Momento ku 2 habitante di Royal Palm Resort ta entregá e petishon na presidente di parlamento…
