WILLEMSTAD.- Ayera e ganadó di un dje kampañanan di Extra, “Ken ta bira Rei òf Reina di Tumba 2024”, sra. Geralda Thodé a pasa tuma su premio gordo gordo. Sra. Thodé a sali e ganadó dor di a yena e kontesta korekto ken ta Rei di tumba i promé finalista. El a gana un pakete gordo pa por selebrá tur e marchanan di karnaval. E pakete grandi ta pa 10 persona, i ta inkluí karni pa grill, biña, serbes, wiski, limonada, djus, ko’i pasa boka etc. Pues hopi kos pa bo selebrá un dushi karnaval kant’i kaya. Geralda Thodé no por a kere su bista ora el a drenta ofisina di Extra i a tuma nota di loke el a gana. Luis Curiel i sra. Sin Paulina hasi entrega di e premio na Geralda. Geralda a konta e ta un fiel lesadó di Extra, el a yena masha tantu formulario, i a depositá esaki serka nos na Extra. Huntu ku su partner, nan a studia tur e 30 tumba nan pa finalmente yega na esun ganadó ku ta Sherrel Denisia i promé finalista Raynor Lauffer.
Manera ariba indiká, un di e kuater kampañanan ku Extra tin a pasa i awor nos ta sigui ku e siguiente kampaña kual di “San Valentino” ku ta terminá 14 febrüari pa 12’or di mèrdia. Aki tambe por gana masha tantu premio. Djis yena e formulario, tir’é den buzon na Extra i bo Dia di San Valentino ta kla….”Extra Love for you”. Ta saka e ganadónan 14 febrüari pa 2’or di mèrdia “live” riba nos plataformanan digital.
Tambe nos tin e tradishonal kampaña di “Pensa i Gana” ku a start for di aña pasá i ta dura te den luna di mart próksimo. Kumpra bo korant tur dia, i djasabra tin di yena den e página mei mei, e partinan ku falta den avisonan. E avisonan ta sali tur dia den korant. Ku e kampaña aki Extra ta regalá NAf. 10.000 repartí entre 7 ganadó.
Un di e kampañanan di tur dia i henter aña t’esun di “Gana hopi plaka kèsh ku Extra”. Bo mester djis yena e number ku bo ta kere ta sali na wega di number Kòrsou tur dia. Ku un tiki suerte, Extra ta regalá bo un bon suma di sèn. Si no tin ganadó, tur dia e premio ta oumentá. Kòrda lesa e reglanan di partisipashon di kada kampaña, i kumpli ku tur rekisito ku ta pidi. No lubidá ningun informashon ku ta pidi. Pues kumprando bo korant tur dia pa keda bon informá, i gana ku Extra tur dia. Finalmente Extra ta gradisí i yama danki na tur su spònsernan ku a i ta partisipá den nos kampañanan.
