WILLEMSTAD.- For di awe tardi 5 or riba páginanan di media sosial di EXTRA por mira un reportahe di investigashon tokante atrako brutal i intervenshon di públiko. Den e reportahe ta investigá kiko a tuma lugá dia 2 di sèptèmber na Punda i kiko e ta nifiká pa nos pais.
Manera ta konosé e dia ei, den sentro di Punda yen yen di hende, dos tipo a bai atraká hendenan di un joyería. Bou di menasa a destruí e vitrinanan i bai ku hopi prenda.
Parti pafó di e establesimentu, tabatin un di e hòmbernan riba un “crosser” tabata warda esun ku tabata kibrando kos i yena saku den e joyería. Danki na intervenshon masal di públiko e dos malechornan por a wòrdu arestá.
Den e reportahe sikólogo Giovanni Eugenia ta bisa ku intervenshon masal di públiko ta algu eksepshonal pa nos pais. E ta splika ku esaki ta mustra ku tin un frustrashon grandi bou di nos pueblo. Den e reportahe a entrevista diferente persona, entre otro komersiante den Punda i tambe un di e testigunan di e atrako.
Segun Mocky Job, doño di negoshi Tik Tak, e atrako ta mustra un bia mas ku polis mester bin bek ku Bike Team full ekipá den sentro di siudat.