WILLEMSTAD.- Ayera parlamentu a deliberá ku Minister di V.V.R.P. sr. Charles Cooper, Minister di Hustisia sr. Shalten Hato i Minister di B.P.D. sr. Ornelio “Kid” Martina enkuanto situashon di seguridat den tráfiko riba nos pais i un maneho nobo di tráfiko pa skapa bida di nos siudadanonan.
Frakshon di PAR a pidi e reunion aki, i sra. Zita Jesus-Leito a splika ku bon mirá nan tabata kier henter e gabinete Pisas den sala di parlamentu, pasobra e reunion tin henter un aspekto. Ayera a bini huntu pa pone kabes huntu komo parlamentarionan, i ku gobièrnu pa atendé e problema aki na un manera ku ta skapa bida di hende, si e kantidat di aksidente ku tin pa dia.
A pidi presensia di e minister di BPD spesífiko pasobra ta bou di dje “büró reibeweis” ta kai i ta na enkargo ora hende ta bai haña reibeweis òf sòru pa sa nos reglanan konforme lei di tráfiko. Sra. Jesus-Leito no ta mira presensia di sr. Martina komo un pèrdèmentu di tempu den sala.
A pidi pa minister di hustisia ta presente, pasobra tin hopi aspekto ku tin di atendé den tráfiko, i no papia mes di e minister ku ta kana pone tur sorto di marka ku no ta pone mes den lei den nos rotòndenan.
Sra. Jesus-Leito a indiká ku esaki ta un promé reunion asina aki ku tres minister, e ta spera ku tur hende ta pone kabes huntu pa prepará bon pa bai reunion públiko, kaminda por bini ku moshon pa gobièrnu por sigui traha riba dje.
Mas aleu e parlamentario a reakshoná riba su kolega Sheldry Osepa kende a indiká ku no por laga tres minister bin pèrdè tempu pa un reunion di komishon den parlamentu. Segun sra. Jesus-Leito, ta na su lugá ku den parlamentu tin oportunidat pa papia ku ministernan, i nan mester tin libertat pa papia. No ta na niun kolega pa wak si ministernan tin tempu pa keda si òf no den sala pa reunion.
E kontesta aki pasobra Osepa tabata kier a sa ta dikon e minister di BPD ta presente pa asuntu di tráfiko. El a bisa ku e kier a djis kòrda ku gobièrnu ta papia ku un boka i tin un sierto maneho ku ta hala liña ku ta kai bou di un maneho ministerial. Pa no tur siman tin tantu minister sintá den sala. Tin kos ku ta ehekutamentu di lei, i no por tir’é riba ministernan. Si parlamentu ta haña ku e lei no ta bon, parlamentu mester kambi’é.
