Nos grandinan tambe por traha nan grupo i bai konosé ken ta George Maduro. Ta trata di e eksposishon habri na Biblioteka Nashonal Kòrsou i ku bou di guia di Jonny Angelica ta kasi drenta den e historia i rebibá kiko George Maduro a nifiká pa esnan ku tabata rònt di dje i pa Kòrsou.

“Nos ta kontentu di por trese e rekorido aki pa tur skol na Kòrsou, pero tambe pa famianan ku ta tuma lugá den museo literario na Biblioteka Nashonal Kòrsou”. E eksposishon aki ta importante pasobra hopi bes nos ta tende di nos héroenan manera Tula,  Luis Brion etc., etc. pero kiko i ken ta George Maduro ku ta un yu di Kòrsou ku a hasi estrago durante di segundo guera mundial na Ulanda. El a salba i skapa kas Real i esei a hasié un héroe grandi na Ulanda pero e ta un yu di Kòrsou. Esaki ta parti di nos historia segun Jonny a konta Djasabra.

E eksposishon i rekorido den e eksposishon George Maduro a kuminsá na luna di mart bin ariba. A duna tur dia djaluna pa djabièrnè 2 klas i tin dia asta tres klas di skol ku a bin pa e rekorido. Tin tabata sa algu kaba di George Maduro pero e detayenan di kiko el a hasi, su strategia ku el a usa durante di segundo guera mundial pa hopi hende ta deskonosí. E rekorido ta kuminsá ku un pelíkula dokumentario di mas òf ménos 12 minüt. Den dje ta haña for di su nasementu te ora el a muri, na edat hóben di 28 aña i e impreshon ku el a laga atras durante ku e tabata prezu pa e alemannan. El a bringa i lucha pa e resistensia, durante ku e tabata na Saarbrucken na un prizòn i mand’é den prisòn den un trein ku tabata transportá bestia, i tòg el a keda animá su koleganan prezu. E legado ku el a laga atras te asta ku el a muri na prensa mundial tabata skibi di dje. Na Cuba den korant a sali den korant ki tipo di hende e tabata.

Nan a purba haña tur skol sekundario na Kòrsou pa por pasa i tuma nota di e eksposishon di George Maduro. Mayoria skol a pasa tambe.

Saarbrucken...

E pelíkula aki a konmové Jonny Angelica mes ora el a mira esaki promé bia. Dado momentu George Maduro tabata prizonero na un prisòn Saarbrucken na Alemania i aliadonan a bin i bombardiá e prizòn pa mata e alemannan. Tabatin pida pida edifisio a kai i George tabatin chèns pa hui pero el a skohe pa no hui pero a skohe pa bai yuda saka e hendenan for di bou di e ruinanan. I asina el a keda detené atrobe.

Korupto....

E alemannan tabata korupto i tabatin chèns ku komo George Maduro su mayornan tabatin hopi sèn nan por a paga pa e sali liber, i nan lo a hasié pero George a bisa ku e alemannan no ta bal ni un depchi pero e ta preferá di muri numa. El a sakrifiká su bida i entrega pa e nashon. E hendenan ku bai e eksposishon mes lo por tuma nota di henter e historia di e bida di George ku a muri promé ku el a kumpli 29 aña.

Paso a paso....

Despues di e pelíkula di 12 minüt, ta kuminsá pasa stap pa stap, ku na promé lugá e stamboom ku ta bai te den siglo 16 ku un historia kompleto siguiendo ku diferente plachi ku e bida i logronan di George Maduro. Huntu ku esaki tin algun pelíkula traha den e mesun organisashon ku a traha esun di George Maduro di 12 minüt aki, ku ta algun dokumentario kòrtiku di 4 i 3 minüt di yu di Kòrsou bonerianonan i arubianonan ku a eksperensia guera mundial di aserka. E   pelíkulanan ei lo por mustra na grandinan.

Dirigí pa grandinan....

Komo tin fakansi di skol den e luna di yüli ku ta kuminsá aki, ta bai konsentrá riba e hendenan di mas edat pa bishitá e eksposishon di George Maduro. E grandinan aki mes por konta tambe kiko nan a eksperensiá. Jonny konosé hende ku tabata hopi envolví den segunda guera mundial manera karpinté ku a traha e fundeshi pa e kayonnan, otronan ku sa di eskonditenan. Tin historia ku e grandinan mes por konta. Dor di wak e pelíkulanan aki, e historianan ta bin ariba. I ni ta importá ku ta hende grandi den ròl stul pero kon ke sea ke haña nan den e museo literario di biblioteka pa tuma nota di e eksposishon. Hopi biaha lugánan pa nos grandinan bishitá ta masha limitá i p’esei mester krea e tipo di posibilidatnan aki pa nan. E grandinan por bin den gruponan di 10 i te asta 15 hende pa tuma nota di e eksposishon. Jonny sa ku tin hende grandi ku no por bai henter e trayektoria di e rekorido, kanando plachi pa plachi pero pa nan tin posibilidat pa sinta i disfrutá di e historia ku e pelíkulanan kòrtiku ta pone nan dilanti. I esei ta yuda refreská e mente. Pa por bishita e eksposishon mester inskribí via e wèpsait www. georgemaduro.com.

Materia seku i laf....

Historia hopi bia ta un materia seku i tin biaha asta laf. Jonny mes no tabata gusta historia na skol avansá. Pero ora e bira algu di bo i ta algu aktivo i por trese pa bib’é manera dado momentu den su kaso kontando e ta bira Hitler, George Maduro, e sòldánan, e spion. Esei ta un di e maneranan pa trese  e historia, e mensahe ku ta bin. E mucha tambe por ta un héroe. Durante di e eksposishon por wak agènda i skrefnan di George Maduro.

Buki di strep....

Na final di e rekorido e bishitantenan/muchanan ta haña un buki di strep. Ta un buki ku ta hasi e historia bibu. Jonny a manda palabra di elogio na Saskia Luckmann ku a hinka henter e eksposishon den otro, buskando plachinan, el a bai Alemania bai den bodeganan i a bin ku diferente opheto manera spada i sapatu di futbòl. E kos aki a hasi hopi impakto i mester duna rèspèt na e trabou ku Saskia a hasi. El a bishitá e famianan i a hasi un investigashon amplio pa yega na e pelíkula i tambe na e eksposishon kompleto.