WILLEMSTAD.- No ta bèrdat ku tin pashènt ku lo a bira siegu despues di tratamentu di bista serka un spesialista mehikano. Asina e Ministerio di Salubridat, Medioambiente i Naturalesa ta duna di konosé den un reakshon emití ayera nochi. Segun GMN, komo reakshon riba informenan ku ta sirkulando i ku ta bisa ku un kantidat di pashènt lo a bira siegu despues di tratamentu/operashon serka un spesialista di wowo mehikano den Advent Ziekenhuis, a laga Inspekshon di Salubridat hasi un evaluashon.
For di esaki a sali na kla ku despues di operashon no tabatin kuestion di pashènt ku a bira siegu dor di e operashonnan ei. Segun e karta, e operashonnan a ser hasí di un manera profeshonal, miéntras ku den e periodonan despues di operashon e pashèntnan ei ta sigui bou di kuido dòkternan di wowo lokal. Por bisa ku serka Inspekshon no tabatin keho a drenta ku parti di pashèntnan ku despues di operashon lo a bira siegu.
