Bash’e den drùms i tanki di awa
WILLEMSTAD.-Áwaseru a kuminsá kai i tin hopi hende ta probechá fangu awa den bari, tankinan di awa òf otro sistemanan pa asina por hasi uso di e awa aki entre otro pa muha mata. Djis paga tinu i tira un bon bista den bari i otro artefaktonan ku nos ta usa pa fangu awa, e dianan aki tur ta yen di larva di sangura. EXTRA a tuma nota ku ministerio di Medio Ambiente, Salubridat i Naturalesa ta partiendo e produkto “Bacillus thuringiensis” pa yuda kombatí sangura.
Ta komprendibel ku hende ke fangu awa, pero ta hopi importante pa tira produktonan apropiá den e bari i asina evitá ku e ta bira un nèshi di sangura ku despues ta bira molèster pa e kas ei i tambe hinter e bario. Den pasado a keda demostrá kon un siudadano tin bari di awa, tayer bieu den kura i otro artefaktonan ku ta fangu awa i esakinan ta yena ku larva i despues hinter un bario ta keda asotá pa plaga di sangura. GMN ta parti e produkto pornada i ku un tiki esfuerso di kada siudadano barionan di Kòrsou por tin ménos sangura.
Algun hóben ta pasa den un pikòp ku logo di GMN i nan ta puntra si e abitante tin barí òf tanki di awa kaminda ta fangu awa. Ta parti produkto “Bacillus thuringiensis” pa esnan ku tin drùms i tin otro tipo pa esnan ku ta usa tanki di plèstik pa fangu awa. Nan a kuminsá parti pariba di Kòrsou i poko poko ta sigui bai wèst te ora yega Banda Bou.
“Bacillus thuringiensis (Bt)” ta un tipo di bakteria ku ta biba den tera. E ta produsí proteina ku ta tóksiko pa sierto insekto ora ku nan kome. E proteinanan no ta tóksiko pa humano pasobra e no por keda aktivá den kurpa humano. Estudionan di institutonan di salubridat ta bisa ku por konsiderá Bt safe pa humanonan.