ORANJESTAD – Minister di Asuntonan Economico mr. Geoffrey Wever a anuncia cu lo continua exploracion di e potencial economico di un Fast Ferry entre Aruba y Corsou. Riba peticion conhunto cu Minister di Transporte, Ursell Arends, conseho di minister a duna su aprobacion pa explora introduccion di un ruta maritimo entre Aruba y Corsou. No ta prome biaha cu un gobierno di Aruba ta haci un anuncio asina. Den pasado, tur anuncio asina a keda solamente na anuncio, sin ehecucion real. Tempo lo mustra si e biaha aki si lo logra esaki.
Un di e motibonan pa e exploracion ta cu e impacto di e pandemia di corona y subida di gasto di cargo y transporte riba economia di Aruba a acentua aun mas e necesidad pa crea mercadonan nobo y expande mercadonan existente via e sector maritimo. Desaroyo di e sector maritimo lo stimula mas comercio, inversionan y expande opcionan di productonan pa e consumidor. Esaki ta na beneficio di e desaroyo economico di Aruba.
