MIAMI, AP.- Un grupo na fabor di persona koló skur a presentá un demanda kontra gobièrnu merikano. Esaki ta indiká ku e komentarionan despektivo resien di presidente Donald Trump, kontra inmigrantenan i nan pais di e orígen ta demostrá diskriminashon rasial ku ta influensiá e desishon ofisial di pone fin na protekshon pa kasi 60.000 haitiano.
E Asosiashon Nashonal pa Progreso di Hende Koló Skur a demanda e Departamento di Seguridat Nashonal djárason, den un tribunal federal na Maryland.
E Fondo di Defensa Legal i Edukativo di e grupo a denunsia ku e dependensia no a mantené su mes na e debido proseso, miéntras e tabata konsiderá pa òf no renobá e status di protekshon temporal otorgá na inmigrantenan haitiano despues di e temblor devastador ku a afektá e pais na 2010.
Na lugá di revisá e echonan riba e kondishonnan na Haiti desde e temblor, inkluyendo un brote di kólera ku ta kontinuá i e devastashon kousá pa orkan Matthew na 2016, e funshonarionan di Departamento di Seguridat Nashonal a opta pa reforsá e stereotiponan riba e komishon di delito di parti di inmigrantenan koló skur ku ta haña asistensia públiko, segun e demanda.
E status di protekshon temporal ku ta permití haitianonan pa biba i traha legalmente den Merka despues di e temblor di 2010 a wòrdu renobá vários biaha.
