Viola Ravenstein ta konta di

Despues di basta tempu, teatro riba podio a bin bèk den moda. Grupo Ekspresá ta presentá e obra Bida Pekuliar, dirigí pa Viola Ravenstein.

Grupo Ekspresá

Grupo Ekspresá a keda fundá den 2021. E grupo a keda kreá pa trese historia i kuenta den forma ku e personahe ta duna e palabranan bida. Ántes tabata asina ku bo ta haña un buki i bo mester a lesa e. Viola ta konta ku promé bia ku el a wak un obra presentá di e manera aki, e tabata tin 21 aña. Ku su eksperensia komo dosente, e ta bisa ku mayoria hende ku para dilanti di klas tin e abilidat natural pa presentá komedia. A base di su profeshon, el a rekruta diferente dosente. Na komienso, e obranan tabata presentá na universidat i aktualmente esaki ta tuma lugá na CCC.

Pashon pa teatro

Viola ta ekspresá su pashon pa teatro i kuantu plaser e tin pa skibi i dirigí kada obra, manera ‘50 aña, tempestat den famia’. E obra menshoná tabata konsistí di 12 sekshon. Pa sekshon dos obra tabata keda presentá ku un durashon total di 45 minüt. E tipo di obranan aki praktikamente a disparsé pero e interes a keda si. Ta trata di obranan kaminda ta lesa historianan, kaminda e diferente personahenan mes ta bin na palabra. Ta trata di “oeuvres di kosnan ku a sosodé kisas den ambiente di famia ku a sòru entre otro pa problema. E públiko ta rekonosé e susesonan i a biba ku esakinan miéntras ta duna opinion abiertamente sea pro òf desaprobashon di esaki. I e outor di e oeuvres ta Viola Ravenstein.

Fundashon Artescrita

Den 2019, a funda Fundashon Artescrita, un organisashon ku ta enfoká riba literatura i deklamashon. Komo un taki di Fundashon Artescrita, Viola a forma e Grupo Ekspresá ku ta un plataforma pa presentá obranan teatral di su inspirashon.

Grupo Maestronan Ekspresá

Un otro proyekto ku Viola ta usa pa promové su aspirashon pa arte, ta Grupo Maestronan Ekspresá. E grupo aki ta spesialisá den kanto i músika i ta forma parti di Kor di Santa Famia.

E obra

Viola Ravenstein, ku un pashon profundo pa teatro i arte di palabra, a skirbi tur e obranan ku ta forma parti di Grupo Ekspresá. Esun mas resien ta Bida Pekuliar. E nòmber ya ta bisa tur kos. E ta un historia prèt, pero alabes, e ta konta loke ta pasa aktual den famianan. Di un manera fiktisio, Viola ta trese aspektonan real ku ta pasa den famia den forma di un obra. E ta toka e parti doloroso, ku hopi di nos no gusta kompartí. E momentunan tristu, rabia ku por kousa desunion, tambe e amor ku bo ta risibí den un famia.

Viola ta bisa ku tin hopi interes den e obranan. Semper e públiko presente ta masha interaktivo. Nan ta papia, hari i duna komentario durante e presentashon.

Kada presentashon ta konta ku 2 pa 3 historia kòrtiku. E historianan ta relatá kosnan ku a pasa den bida di un òf mas persona ku debí na bèrgwensa òf tambe orguyo ta keda tene sekreto. E obra ta atraktivo pa tur hende pero enpartikular tur ku ta gusta literatura.

Mas interes di hóbennan

Loke ta laga di deseá ta ku bo no ta mira hóben ta bai wak e obranan. Viola su deseo ta pa inkluí mas hóben pa forma parti di e grupo. Un manera ku Viola ta purba inkluí e hóben ta dor di deklamashon. Banda di e obra, tin e parti di deklamashon. Viola ta bisa ku mayoria biaha e ta keda presentá pa hóben. E hóben ta risibí entrenamentu, i den nan mes estilo nan ta presentá e poema. Viola ta enfatisá ku mester realisá ku tempu a kambia. Tanten e hóben ta hasi algu positivo, purba sostené e hóben, ya asina e por sigui den e bon kaminda.

Eksperensia

Viola ta konta su eksperensia ku ora e tabata chikí e tabata gusta lesa. Na klousura di aña eskolar, tabata finalisá e aña ku e evento ‘Bonte Avond’. Un anochi kaminda tur hóben mester a presentá riba podio. Un di e presentashon na e aktividat tabata un obra teatral. Asina e idea a keda den Viola su kabes, i el a bisa su mes, “mi mester rebibá e eksperensia aki”. Su plan pa e rebibá e aktividat aki ta pa introdusí ‘Bonte Avond’ den skol. Siguiente aña eskolar e ta bai traha na un skol sekundario kaminda e ta bai introdusié pa medio di arte di palabra, ku ta bai tin deklamashon, historia i kuenta. El a papia ku e skol i tin basta interes. Un evento asina ki por yuda e hóben desaroyá su abilidat di lesa, komuniká i aktuashon. Aparte di esaki, huntu ku 3 otro dosente, Viola ta purba buska hóben pa forma parti di e organisashon. E dosentenan tin mas konosementu kon pa atraé e hóben.

Oportunidat

Viola ta ekspresá ku e ke e oportunidat pa sinta ku Minister di Enseñansa pa deliberá algun asuntu relatá na edukashon. Viola ta konsiente ku tempu a kambia, pero e ta enfatisá ku no ta tur kos mester kambia. E no ta un tarea solamente di minister, si ta nesesario pa e minister usa su bos pa lanta atenshon. Un dosente ta un refleho pa e mucha. Ta di suma importansia pa e dosente su komportashon, tantu personal komo riba media sosial ta reflehá un bon imágen pa e hóben. E ta doló di mira e nivel di komportashon di e dosentenan di e tempu di

awor.

Viola ta finalisá ku, “tipo di aktividatnan manera teatro ta yuda engrandesé e hóben. Mester implementá e parti di ekspreshon bèk den edukashon. Esaki ta importante pa ku e hóben su desaroyo”.

Bida Pekuliar ta un testimonio di loke ta pasa aktual den famia den un forma kreativo. Viola i Grupo Ekspresá ta invitá pueblo di Kòrsou na e próksimo presentashon di Bida Pekuliar ku ta hunga 7 di Yüni i 5 di Yüli na Sentro Kultural Kòrsou. Karchi ta optenibel na Mensing I tambe serka tur miembro di grupo. Ademas, por tuma kontakto ku Viola na 518-2497, pa bo karchi. No pèrdè e!