ORANJESTAD.- Diabierna atardi 3 di november un grupo di personanan religioso a manifesta na un forma pacifico pa laga Gobierno su cu e intencion di algun Parlamentario pa legalisa matrimonio di mesun sexo ta contra e boluntad di mayoria di pueblo.
Segun e grupo, e comunidad homosexual no ta wordo trata diferente pasobra tin comerciante homosexual, hefe di departamento di gobierno homosexual, abogado homosexual y hopi mas kendenan no ta wordo stroba den nan trabou.
Nan ta sigui bisa cu pa loke ta matrimonio di mesun sexo e corte mas halto den e asunto aki ya a duna su veredicto. Casamento no ta un derecho pa un hende cu kier casa cu mesun sexo. Esey kiermen cu si leynan di Aruba no ta permiti casamento di mesun sexo esaki no ta discriminacion. Den casonan mester tin trato igual pero Corte Europeo pa Derecho Humano a bisa cu akin io ta trata di casonan igual.
E grupo a sigui bisa diabierna cu pueblo di Aruba no ta desea di mira un par di Parlamentario busca diesun voto pa asina haci matrimonio di mesun sexo legal na Aruba.
E peticion cu lidernan religioso segun nan, den nomber di un gran mayoria di e pueblo di Aruba ta haci ta pa gobierno pidi cooperacion di Parlamento pa no trata e proposicion di ley matrimonio di mesun sexo te ora gobierno haci un sondeo representativo den pueblo tocante a topico aki. “Sikiera e respet aki nos gobernantenan por demostra na pueblo” e grupo a finalisa bisando. Nan a entrega e 18 mil firmanan colecta na minister presidente interino Ursell Arends.
REACCION DI GOBIERNO
Gobierno di Aruba a reacciona mesora, unda cu minister Arends a bisa e.o. cu muestra bibo di nos democracia ta den e derecho igual di tur hende pa manifesta nan opinion y sentimentonan na Pais Aruba. Ta netamente e mesun derecho igual aki ta locual ta den discusion. “ Gobierno di Aruba tin e tarea di scucha su ciudadanonan y na mes momento garantisa cu derechonan universal di cada ser humano ta wordo honra. Cada persona den Gobierno y Parlamento a priminti di sirbi nos pais respetando nos constitucion” e mandatario a sigui bisa. “Como vice-minister president, representando Gobierno di Aruba, mi por bisa cu mescos cu den comunidad, den e gabinete por tin diferente pensamento individual riba e tema di matrimonio entre pareha di mesun sexo.
Pero manera nos Minister President a indica den su discurso na Den Haag, Pais Aruba ta boga y lo sigi boga pa igualdad pa hende muhe, e comunidad LBGTQIA+ y tur otro grupo marginalisa. Desde 2017 nos a boga pa Igualdad y inclusion cu ta balornan clave den un comunidad cu tin compasion pa nan prohimo. Minister Arends y Minister Geoffrey Wever a ricibi e manifesto di lidernan religioso dilanti bestuurskantoor y lo comparti esaki den conseho di minister. “E lo haya su debido atencion, igual na e atencion cu nos ta duna esnan cu un otro opinion,” Minister Arends a finalisa bisando.
