CARACAS, AP.- Coronavirus a yega Uruguay, Guatemala i Venezuela. Outoridat di e paisnan aki a konfirmá su promé kasonan djabièrnè miéntras Argentina a anunsiá su segundo morto. Ecuador i El Salvador a reforsá medidanan pa kontené avanse di e enfermedat.
E visepresidente venezolano Delcy Rodriguez a indiká ku tin dos kaso den estado di Miranda. Ta trata di un muhé di 41 aña i un hòmber di 52, kende nan identidat no a wòrdu detayá. E muhé tabata na Merka, Italia i Spaña i e hòmber tabata na Spaña. Ambos a wòrdu aislá.
Rodriguez a anunsiá suspenshon di aktividatnan di skol den e pais kompleto desde djaluna i a pidi tur esnan riba 70 aña pa purba keda den kas. El a agregá ku uso di masker ta obligatorio den metro i treinnan di Caracas.
Venezuela ta pasando dor di un krísis sanitario profundo. Ningun hospital públiko ta operando normal pa falta di awa, remedi, fayo di ekiponan médiko i falta di personal.
E promé víktima na Argentina tabata un hòmber di 64 aña ku a biaha pa Fransia. El a muri seis dia pasá na Buenos Aires.
