BOGOTA, COLOMBIA, AFP.- Un di e rebeldenan ku a funda FARC mas di mei siglo pasá, Jaime Guaracas, a fayesé djamars anochi na Cuba pa motibunan no dibulgá, segun informashon di e grupo ku a bira un partido polítiko despues di un akuerdo di pas ku e gobièrnu di eks presidente Juan Manuel Santos.
“Ku doló nos ta partisipá fayesimentu di Jaime Guaracas, fundadó di FARC kende a muri na Havana”, asina e eks gueria komunista a skibi riba su kuenta di Twitter .
E partido Forsa Alternativo Revolushonario Komun (FARC), a surgi despues di un akuerdo di pas di aña 2016, kual a pone fin na mas di sinku dékada di konflikto arma.
Guaracas a forma parti di e delegashon di pas di e eks gueria komunista den vários negosiashon ku a tuma lugá na Havana entre 2012 i 2016. E akuerdo a pone ku 7.000 kombatiente a entrega nan arma.
