TOKYO, AP.- Hapon a anunsiá su promé morto pa e vírus nobo djaweps, algun ora despues di a konfirmá ku tin 44 kaso mas riba e krusero ankrá na Tokyo.
E minister di salú Katsunobu Kato a bisa ku e promé morto ta un muhé di mas di 80 aña kende tabata hospitalisá desde 1e di febrüari. El a wòrdu diagnostiká despues ku el a fayesé.
E funshonario a agregá ku a konfirmá dos kaso mas di Coronavirus.
Algun ora promé, Kato a anunsiá ku tin 44 kaso mas riba e krusero Diamond Princess, ku 3.500 pasahero i tripulante na bordo. E barku tin un total di 218 persona infektá ku Coronavirus desde ku el a ankra na Yokohama riba 3 di febrüari.
China a reportá 1.367 morto i 52.525 kaso riba e teritorio kontinental. Hong Kong i Filipina a reportá un kaso kada unu.
E gobièrnu a disidí ku lo permití esnan riba 80 aña pa baha di e krusero si e tèst sali negativo segun informashon di Kato. El a agregá ku 200 persona ta wardando riba resultado i ku lo duna prioridat na esnan ku problema króniko di salú i esnan ku tin un kabina sin bentana.
