Soraida Bishop
Awendia nos bida ta hopi purá ku resultado di un nivel di strès hopi haltu. Strès ta tera fértil pa hopi tipo di malesa manera preshon haltu, ataka di kurason i tur tipo di kanser. Promé ku bo bira malu e kurpa ta sinti su mes otro manera doló di kabes, kansá i un mente ku ta lubidá kosnan hopi lihé. Bo energia di bida, energia vital ta abou! Kiko ta Energia Vital den kurpa di ser humano? T’asina ku nos komo ser humano a nase ku loke loke sientífikonan ta yama “Energia Vital”. Sin energia vital no tin bida. Fundamentalmente tur materia den kreashon ta trahá di energia. Nos sintimentunan i pensamentunan tambe ta manera ondanan di energia. E energia aki ta konektá ku e energia di universo. I ta netamente den e kuadro aki Fundashon Grupo pa Komunidat ta duna e oportunidat pa otro kurso di Pranic Healing. Soraida Bishop a kompartí ku nos di Djasabra un biaha mas kiko na Pranic Healing i kiko tur por spera.
Forsa di bida
Pranic ta bin di e palabra Prana i esei ta nifiká e forsa di bida. Bo ta kura bo mes ku e forsa di bida. Esei ta Pranic Healing esta yuda bo mes ku energianan eksistensia di solo i tera i kitando energia di bida ku no tei mas i ku ta trese malesa i stroba i trese energia di bida ku ta yuda bo bida pa bo mes yuda kura bo mes. Ta un método di 5 mil aña pasá, ideanan ya a kuminsá bin kaminda hendenan na India a kuminsá wak kiko ta bida, nan a kuminsá hasi investigashonnan kon bida ta desaroyá. Asina a bin riba dje ku tin energia di bida den tur kos i kon por hasi uso di dje pa bo bida ta mas dushi. Sin energia no tin bida, sin rosea no tin bida. Bo rosea ta duna bu energia di bida.
Energia den tur kos
E no tin nada di aber ku religion. No tin un energia di un religion, niun energia ta usa otro religion. E tin tur nashon, hòmber muhé i no tin rasa. E ta simplemente energia di bida. I Pranic Healing a keda desaroyá pa Master Choa Kok Sui ku ta e maestro i ku a trese e sistema moderno di Pranic Healing. Master Choa Kok Sui, desaroyadó di Pranic Healing, a opservá e eksistensia di energia vital i a tuma nota ku esaki konstantemente ta afektá salú i bienestar di hende sea nan ta konsiente di dje òf no.
Pa medio di investigashonnan sistemátiko i opservashon huntu ku un tim di klarividente, a dedusí ku hende ku un kantidat di energia vital abou, tin e tendensia di ta suak i malu, ku un oura mas suak. Mientrastantu esnan ku un kantidat di energia vital mas haltu tin e tendensia di ta mas salú, huntu ku un oura mas briante. Master Choa Kok Sui despues di kasi 20 aña di investigashon por a validá e resultadonan aki. Ku e resultado aki popularidat di Pranic Healing a bira konosí rònt mundu. Un sistema moderno ku a keda adaptá na nos bida di tur dia Master Kok Sui no tei mas pero a laga e konosementu atras pa un i tur. Henter Kòrsou i tur hende por hasi uso di e energia di bida pa hasi nos bida mas dushi.
Limpia ku koló
Pranic Healing ta traha ku diferente koló. Segun e splikashon di Soraida, regenbog tin diferente koló i asina bo kurpa tin puntonan di bida ku ta apsorbé koló ku ta yuda mihó. Por ehèmpel bo por kana bon i e kanamentu tin di aber ku bo root chakra ku por ehèmpel e koló kòrá pa limpia i kita energia malu i trese e energia ku ta duna bida atrobe. Ta dependé kiko bo tin i kon bo ta usa e kolónan. Ora bin e kurso básiko bo ta siña e koló i den e kurso avansá ta bai mas dirigí. Si tin di laba tayó i bo lab’é ku awa so, e ta limpia si pero ora pone habon aserka e ta limpia mas limpi. Ta meskos ku hasi uso di koló ta limpia mas mihó i hasi e kosnan lombra mas mihó. I asina e proseso ta kana mas lihé.
Funshoná mihó
Loke nos kier a sa ta kua parti di kurpa ta apsorbé energia mas lihé òf kua parti di kurpa ku ta tuma e energia malu mas lihé pasobra un kurpa tin diferente punta. Segun Soraida e ta dependé di kada hende, Por ehèmpel si tende un hende bisa ku e tin rabia te den su higra, esei ke men ku e higra ta apsorbé tur e energia malu. Asina tin diferente punto mas. Nos tin ekspreshonnan den idioma ku no ta djis idioma pero ta echt e kaminda ku ta apsorbé e energia i ta hasi e kurpa malu. Si hasié un dia so i lag’é bai no ta nada pero si e energia keda den kurpa, e ta sigui krese, sèlnan otro ta nase ku bo no ta deseá. I Pranic Healing ta yuda pa e energia malu. I asina e kurpa ta kuminsá funshoná mas mihó. Si e hende ta rabiá i ta keda rabiá i ni maske e limpia e ta bira shushi bèk i e energia malu ta keda. E hende mester traha riba su mes tambe i esei Pranic Healing ta duna.
Kursonan
Di 12 pa 16 di òktober awor tin e kurso di Pranic Healing. Soraida a konta nos ku e kurso ta henter dia, di mainta te atardi. Dia 12 i 13 ta 2 dia kompleto di kurso básiko i ei den ta haña sa e téknikanan básiko pa hasi uso di dje ku bo por kuminsá kura bo mes. I despues tin e kurso avansá pa usa e kolónan i hasi e proseso mas lihé. Si promé bo ta limpi ku blanku ku ta simpel, ora bai hasi e kurso avansá ta kuminsá usa otro kolónan pa limpia mas mihó. Djasabra i djadumingu lo ta e kurso avansá. I tin un kurso mas ku ta kon pa ta mihó hende. Nos kurpa ta wesu, karni i tin e alma. I e ta yuda bu ta mas kontentu ku bo mes. E di tres kurso ta djadumingu atardi i djaluna henter dia.
Vivec Joshi na Kòrsou
Pa tur e kursonan aki lo ta na Kòrsou Vivec Joshi. Ta un persona hopi positivo ku tei pa yuda un i tur ku e kursonan aki. Dia 11 di òktober lo tin un charla ku Vivec, promé ku e kursonan. E charla lo ta grátis i Vivec lo duna demostrashon no ta duna e Healing i e lo hasié ku un hende den esnan presente.
Nada di brueria ni hipnotisashon
I Pranic Healing no tin nada di aber ku brueria ni ku hipnotisashon. E ta simplemente energia di nos kurpa i energia ku tei kaba, di solo, tera i awa, ta energia di mundu ku tur hende tin a nan disponibilidat i esei nan ta hasi uso di dje. Despues di e kurso mester sigui train i mester siña kon ta hasi uso di dje na bo kas mes. E fundashon lo no laga niun hende nan so pero lo tin training i hopi mas.
Inskribí
Pa por haña mas informashon i inskribí por app na 518-1223 òf 514-3620. E kursonan ta tuma lugá na Acoya den tur trankilidat. Den e kurso lo haña konosementu i mesora apliká. Lo no chòk e kurso ku hende pasobra kada partisipante mester tin su espasio. Nan ta traha ku baki ku awa i salu loke ta e hèrmèntnan pa traha kuné.
